21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Ինչ է թաքնված Խաչատուր Սուքիասյանի բղավոցների տակ. ՏԵՍԱՆՅՈՒԹ
Քաղաքականություն
18.04.2025 | 20:15
Ազգային ժողովի ՔՊ-ական պատգամավոր Խաչատուր Սուքիասյանը հունից դուրս է գալիս ու կորցնում ինքնատիրապետումը, երբ դեռևս չէինք հասցրել հնչեցնել հարցը նախօրեին արված իր աղմկահարույց հայտարարության հետ կապված։ Սուքիասյանը նախօրեին հայտարարել էր, թե 2023 թվականի սեպտեմբերի 19-ին ադրբեջանական հարձակման ժամանակ Արցախում զոհեր չեն եղել, ապա ասել, թե 10 զոհ է եղել։
Այդ հարցազրույցից հետո Խաչատուր Սուքիասյանի անունից նրա օգնականն իր ֆեյսբուքյան էջում հայտարարություն է տարածում, որտեղ նշվում է, որ պատգամավորը սխալվել է զոհերի թվի հարցում։
Անշուշտ, դրական է, որ պատգամավորը, գիտակցելով սխալը, օգնականի միջոցով տարածած հայտարարությամբ ներողություն է խնդրում։ Այնուհանդերձ, որոշ հարցեր մնում են չպարզաբանված։ Մասնավորապես, Սուքիասյանն իր հարցազրույցում պնդում է, որ 2023-ի սեպտեմբերին զոհ չի եղել, իսկ այդ մասին բարձրաձայնող լրագրողին անվանում է ստախոս։
Այսօր Սուքիասյանից փորձում էինք ճշտել, թե իր ներողությունը հարցազրույցում արված ո՞ր պնդմանն է առնչվում։ Եթե իշխանական պատգամավորը, այսպես ասած, սխալների ուղղում է անում ու փորձում հավաստիացնել, թե զոհերի թիվը սխալ է նշել, ապա ինչո՞ւ էր հարցազրույցում լրագրողին երեք անգամ ստախոս անվանում՝ նշելով, որ զոհեր չեն եղել։
Սուքիասյանն իր բղավոցներով փորձում էր լռեցնել մեր հարցերը՝ հընթացս հարվածելով միկրոֆոնին։
Անշուշտ, սա լրագրողների հետ շփումներում Խաչատուր Սուքիասյանի՝ ինքնատիրապետումը կորցնելու առաջին դեպքը չէ, սակայն որ նման պահվածք լինի, երբ անգամ հարցը դեռևս չի հնչել, մտորումների տեղիք է տալիս։
Եթե պատգամավորն իրոք շփոթվել էր և նրա ներողությունն անկեղծ էր, այլ ոչ թե ատելության խոսք տարածելու համար հնարավոր քրեական պատասխանատվությունից խուսափելուն ուղղված կանխարգելիչ քայլ, ապա ո՞րն էր պատճառը, որ նա լրագրողներին հանգիստ կերպով պարազաբանումեր ներկայացնելու փոխարեն՝ նախահարձակ եղավ։ Թե՞, այնուամենայնիվ, պատգամավորը գիտակցում է, որ իր ներողությունն արժանահավատ չէ և, հարձակումը լավագույն պաշտպանությունն է սկզբունքով, որոշել էր բղավոցներով լռեցնել լրագրողի հարցերը։ Ընդ որում, նկատենք, որ լրագրողներին պիտակավորող Սուքիասյանն այդպես էլ հարկ չհամարեց ներողություն խնդրել նաև 24news-ի լրագրողից, ում նախօրեին ստախոս էր անվանել, ապա հայտարարությամբ ընդունել, որ ինքն է սխալվել։
ԱԺ «Հայաստան» խմբակցության քարտուղար Արծվիկ Մինասյանը կարծում է, որ ՔՊ-ական պատգամավորը պետք է քրեական պատասխանատվության ենթարկվի ատելության խոսք տարածելու համար։
Արդյո՞ք գլխավոր դատախազ Աննա Վարդապետյանը կգա Խաչատուր Սուքիասյանի հետևից։ Հարցը, իհարկե, հռետորական է։
Վերջում հիշեցնենք, նաև՝ ի գիտություն Խաչատուր Սուքիասյանի, որ համաձայն ՀՀ Քննչական կոմիտեի տվյալների՝ 2023 թվականի սեպտեմբերին Արցախը մեկօրյա ռազմական գործողությունների հետևանքով 223 զոհ է տվել, որոնցից 25-ը՝ խաղաղ բնակիչներ, այդ թվում՝ երեխաներ:
Մանրամասները՝ տեսանյութում։
Նարեկ Կիրակոսյան
