17.07.2026 | 10:52
ԱՄՆ-ը հարվածներ է հասցրել Իրանում կամուրջներին, օդանավակայանին, երկաթուղային կայարանին․ զոհեր կան
Վաշինգտոնը լավատեսորեն է տրամադրված ռուս-ուկրաինական պատերազմի ավարտի հարցում․ ԱՄՆ փոխնախագահ
Քաղաքականություն
18.04.2025 | 18:19
Միացյալ Նահանգները լավատեսորեն է տրամադրված, որ կարող է վերջ դնել Ռուսաստանի և Ուկրաինայի միջև պատերազմին։ Այս մասին հայտարարել է ԱՄՆ փոխնախագահ Ջեյ Դի Վենսը Իտալիայի վարչապետ Ջորջիա Մելոնիի հետ 24 ժամվա ընթացքում երկրորդ հանդիպման ընթացքում, գրում է Reuters-ը։
Վենսը հինգշաբթի Մելոնիին հանդիպել էր Վաշինգտոնում, ինչից հետո նրանք երկուսով մեկնել են Իտալիայի մայրաքաղաք՝ Զատկի տոներից առաջ։
«Ես ուզում եմ վարչապետին տեղեկացնել Ռուսաստանի և Ուկրաինայի միջև տեղի ունեցած որոշ բանակցությունների մասին, նույնիսկ վերջին 24 ժամվա ընթացքում, կարծում ենք, մի քանի հետաքրքիր բաներ ունենք հաղորդելու։ Քանի որ բանակցությունները շարունակվում են, ես չեմ կանխորոշի դրանք, բայց մենք լավատես ենք և հույս ունենք, որ կարող ենք ավարտել այս դաժան պատերազմը»,- ասել է Վենսը լրագրողներին։
Այսօր ավելի վաղ էլ ԱՄՆ պետքարտուղար Մարկո Ռուբիոն հայտարարել էր, որ նախագահ Դոնալդ Թրամփը կհրաժարվի Ռուսաստանի և Ուկրաինայի միջև խաղաղության համաձայնագրի միջնորդության փորձերից, եթե մի քանի օրվա ընթացքում հստակ նշաններ չլինեն, որ համաձայնության կարելի է հասնել։
Հիշեցնենք, որ Մելոնին հինգշաբթի Վաշինգտոնում հանդիպել էր ԱՄՆ նախագահ Դոնալդ Թրամփի հետ։ Նույն օրը Փարիզում հանդիպում էին անցկացրել Միացյալ Նահանգների, Ուկրաինայի և նրա եվրոպացի դաշնակիցների ներկայացուցիչները։ Թրամփն էլ հայտարարել էր, որ առաջիկայում որոշակի տեղեկատվություն է սպասում Մոսկվայից։
Դրանից հետո ԱՄՆ պետքարտուղար Մարկո Ռուբիոն հեռախոսազրույց էր ունեցել Ռուսաստանի արտաքին գործերի նախարար Սերգեյ Լավրովի հետ, սակայն այս զրույցի արդյունքում որևէ կարևոր պայմանավորվածության մասին չի հաղորդվել։
Թարգմանությունը՝ Էմմա Չոբանյանի
