Քաղաքականություն
18.04.2025 | 21:22
Իրանի ԱԳ նախարար Աբբաս Արաղչին հայտարարել է, որ Միացյալ Նահանգները լրջություն է ցուցաբերել Օմանում կայացած բանակցությունների առաջին փուլում՝ հավելելով, որ շաբաթ օրը Հռոմում կայանալիք բանակցություններում հնարավոր է համաձայնության գալ, եթե ԱՄՆ-ը չափազանց պահանջներ չներկայացնի։ Mehr գործակալության փոխանցմամբ՝ Արաղչին այս մասին հայտարարել է Մոսկվայում կայացած համատեղ մամուլի ասուլիսում՝ իր ռուս գործընկեր Սերգեյ Լավրովի հետ։
«Նրանց պատրաստակամությունը՝ մասնակցելու լուրջ բանակցություններ վարելուն, որոնք կանդրադառնան միայն միջուկային հարցին՝ առանց այլ հարցերի անդրադառնալու, կարող է մեզ տանել կառուցողական բանակցությունների»,- ասել է իրանցի դիվանագետը։
Նա նշել է, որ Միացյալ Նահանգները մասնակի լրջություն է ցուցաբերել Օմանում բանակցությունների առաջին փուլում՝ հավելելով․ «Եթե չափազանց անիրատեսական և անիրագործելի պահանջներ չառաջադրվեն, համաձայնության հասնել հնարավոր է»։
Արաղչին ասել է, որ ԱՄՆ-ի հետ բանակցությունները վարվում են անուղղակիորեն՝ Վաշինգտոնի կողմից կիրառվող սպառնալիքների և առավելագույն ճնշման պատճառով, միաժամանակ, նշել, որ «անուղղակի բանակցություններն արտասովոր բան չեն, և այս մեթոդով համաձայնության հասնելը հնարավոր է»։
Նա հավելել է՝ Իրանը կիսվում է Ռուսաստանի և Չինաստանի հետ բանակցությունների ու միջուկային բանակցությունների մասին լուրերով՝ բարձր գնահատելով Ռուսաստանի դերը 2015 թվականին Իրանի միջուկային համաձայնագրի կնքման գործում։
Իր հերթին, Ռուսաստանի արտաքին գործերի նախարար Լավրովը հայտարարել է, որ «Ռուսաստանը պատրաստ է նպաստել Իրանի և ԱՄՆ-ի միջև Թեհրանի միջուկային ծրագրի վերաբերյալ բանակցային գործընթացին»։
Հիշեցնենք, որ առաջին փուլի բանակցությունները տեղի էին ունեցել ապրիլի 12-ին Օմանում։ Իրանական կողմից մասնակցել էին արտաքին գործերի նախարար Աբբաս Արաղչին, իսկ ամերիկյան կողմից՝ նախագահ Դոնալդ Թրամփի հատուկ բանագնաց Սթիվ Ուիթքոֆը։ Բանակցությունների երկրորդ փուլը տեղի է ունենալու ապրիլի 19-ին Հռոմում, թեպետ Իրանի ԱԳՆ-ն ավելի վաղ հայտարարել էր, որ դրանք կայանալու են կրկին Օմանում։
Թարգմանությունը՝ Էմմա Չոբանյանի
