«Թող ընդդիմությունը հասկանա` ինչ է անում». Սարիկ Մինասյանի շտաբից մեկնաբանություն չունեն

Factor.am-ն այսօր այցելեց ՔՊ կուսակցության գրասենյակ, բայց մեզ չհաջողվեց զրուցել Գյումրիի արտահերթ ընտրություններում 36,21 տոկոս քվե ստացած «Քաղաքացիական պայմանագիր» կուսակցության քաղաքապետի թեկնածու Սարիկ Մինասյանի հետ:  Մինասյանը նաև հեռախոսազանգերին չի պատասխանում, իսկ շտաբի խոսնակ Վովա Հակոբյանը մեզ փոխանցեց, որ մեկնաբանելու բան չունեն։ «Թող ընդդիմությունը հասկանա՝ ինչ է անում»,- ասաց Հակոբյանը:

Հիշեցնենք ընտրությունների արդյունքներին իշխանության թեկնածուն միայն ֆեյսբուքյան գրառմամբ էր անդրադարձել, որում ասված է։

«Հարգելի՛ գյումրեցիներ, սիրելի՛ համաքաղաքացիներ, շնորհակալ եմ յուրաքանչյուրիդ քվեի, յուրաքանչյուրիդ վստահության և պատվախնդրության համար:
Մեզ համար մարդը բարձրագույն արժեք է, մեր սկզբունքներում տեղ չունեն սպառնալիքը, պարտադրանքը, խաբեությունը, ցինիզմն ու սուտը:
Սիրելի՛ գյումրեցիներ, պարտավորված ենք ձեր վստահության համար, որն ի ցույց եք դրել ապահովելով կրկնակի քվեներ` ի համեմատություն շեմը հաղթահարած 2-րդ ուժի: Մեզ տրված քվեները չենք փոշիացնելու, այն ծառայելու է Գյումրուն ու բոլոր գյումրեցիներին: Շարունակելու ենք Գյումրու զարգացման և շենացման մեր բոլոր ծրագրերը»:

Նշենք, որ հայտնի չէ «Մեր քաղաքը» դաշինքի քաղաքապետի թեկնածու Մարտուն Գրիգորյանի դիրքորոշումը. նա երեկ օրվա վերջում խախտեց լռությունը` վերահաստատելով իր մոտեցումը՝ ՔՊ-ն Գյումրիում քաղաքապետ չի ունենալու, սակայն չհստակեցնելով՝ արդյոք դա նշանակում է, որ պատրաստ է աջակցել ամենաշատ ձայներ ստացած ընդդիմադիր թեկնածուին։

Անցողիկ շեմը հաղթահարած ընդդիմադիր մյուս թեկնածուները` Ռուբեն Մխիթարյանն ու Կարեն Սիմոնյանը, երեկ հայտարարել են, որ պատրաստ են աջակցել «Հայաստանի կոմունիստական» կուսակցության քաղաքապետի թեկնածու Վարդան Ղուկասյանին, որը ընդդիմադիր թեկնածուներից առավելագույն ձայներն է ստացել:

Արփի Հակոբյան