Թուրքիայի ԱԳ նախարարը Ֆրանսիա է մեկնում

Թուրքիայի ԱԳ նախարար Հաքան Ֆիդանը ապրիլի 2-ին պաշտոնական այցով կմեկնի Փարիզ՝ հանդիպելու իր ֆրանսիացի գործընկեր Ժան-Նոել Բարրոյի հետ։ Նախատեսվում է քննարկել երկկողմ հարաբերությունները և տարածաշրջանային ու միջազգային ակտուալ զարգացումները, գրում է Hurriyet Daily news-ը։

Թուրքական դիվանագիտական ​​աղբյուրները տեղական լրատվամիջոցներին  հայտնել են, որ բանակցությունները կանդրադառնան Թուրքիա-Ֆրանսիա հարաբերություններին, ԵՄ-ի հետ Անկարայի կապերին, եվրոպական անվտանգությանը, Ուկրաինայի և Գազայի պատերազմներին, Սիրիայում իրավիճակին:

Աբյուրները նշում են՝ ակնկալվում է, որ տնտեսական համագործակցությունը նույնպես կլինի առանցքային թեմա։ Ֆիդանը կքննարկի առևտրի, ներդրումների, էներգետիկայի և զբոսաշրջության ոլորտներում կապերի ամրապնդումը։ Թուրքիայի և Ֆրանսիայի միջև երկկողմ առևտուրը 2024 թվականին հասել է մոտ 22,5 միլիարդ դոլարի՝ նախորդ տարվա 21 միլիարդ դոլարի դիմաց։ Թուրքիան Ֆրանսիայի խոշորագույն արտահանման շուկաների շարքում զբաղեցրել է 11-րդ տեղը։

Ակնկալվում է, որ Ֆիդանը նաև մտահոգություն կհայտնի, իբր, ռասիստական ​​և ծայրահեղական շարժումների վերաբերյալ, որոնք ուղղված են Ֆրանսիայի թուրքական համայնքին, որոնց թիվը շուրջ 800,000 է: Նա նաև հանդես է գալու ավելի սերտ համագործակցության օգտին պաշտպանական արդյունաբերության ոլորտում և կոչ կանի վերացնել արտահանման սահմանափակումները։

Թուրք բարձրաստիճան դիվանագետը պատրաստվում է ընդգծել ահաբեկչության դեմ պայքարում համատեղ ջանքերի անհրաժեշտությունը՝ վերահաստատելով Թուրքիայի ակնկալիքը՝ դադարեցնել PKK-ի և YPG-ի ներկայությունը Սիրիայի հյուսիսում և շարունակվող աջակցությունը  ԻԼԻՊ-ի դեմ պայքարին։ Ֆիդանը նաև կհաստատի Թուրքիայի պատրաստակամությունը՝ նպաստելու Ռուսաստանի և Ուկրաինայի միջև արդար և կայուն խաղաղության հաստատման դիվանագիտական ​​ջանքերին։

Մեկ այլ առանցքային ուշադրության կենտրոնում կլինի եվրոպական անվտանգությունը, որտեղ Ֆիդանը շեշտելու է Թուրքիայի դերը մայրցամաքի պաշտպանական շրջանակի ձևավորման գործում:

Ֆիդանն ավելի վաղ ասել էր, որ ցանկացած եվրոպական անվտանգության ճարտարապետություն, որը բացառում է Թուրքիային, «իրատեսական չէ»՝ ընդգծելով երկրի ռազմավարական դիրքը։

Թարգմանությունը՝ Էմմա Չոբանյանի