Ինչ իրավիճակ է Մարտուն Գրիգորյանի շտաբում․ ՏԵՍԱՆՅՈՒԹ

Factor.am-ն արձանագրել է, որ Գյումրիի ավագանու ընտրություններում անցողիկ շեմը հաղթահարած «Մեր քաղաքը» դաշինքի քաղաքապետի թեկնածու Մարտուն Գրիգորյանի շտաբում ոչ ոք չկա:

Մարտուն Գրիգորյանը ընտրություններից երկու օր անց չի հստակեցրել` ում հետ է կոալիցիա կազմելու: Նա միայն երեկ օրվա վերջում ֆեյսբուքյան էջում կարճ գրել էր, որ վերահաստատում է`ՔՊ-ն Գյումրիում քաղաքապետ չի ունենալու:

Ի տարբերություն Մարտուն Գրիգորյանի, ավագանու կազմ անցած ընդդիմադիր մյուս 3 թեկնածուները հայտարարել են, որ պատրաստ են համագործակցել և կոալիցիա կազմել:

Ընդդիմադիր քաղաքական ուժերից ամենաշատ քվեն ստացել է «Հայաստանի կոմունիստական» կուսակցության քաղաքապետի թեկնածու Վարդան Ղուկասյանը, որի հետ Մարտուն Գրիգորյանը տարաձայնություններ ունի: «Իմ հզոր համայնք» կուսակցությունն ու «Մայր Հայաստան» դաշինքը հենց Վարդան Ղուկասյանին են աջակցելու` քաղաքապետ ընտրվելու հարցում: Արդյոք Գրիգորյանի երեկվա հայտարաությունն էլ ակնարկ է այն մասին, որ կաջակցի Ղուկասյանին` պարզ չէ. նրա հետ երեկվանից կապ հաստատել չի հաջողվում: Մեր տեղեկություններով` Մարտուն Գրիգորյանն այսօրվա ընթացքում հայտարարություն կտարածի` հայտնելով իր քայլերի մասին: Գյումրիի քաղաքապետի արտահերթ ընտրություններում նախնական տվյալներով՝ Մարտուն Գրիգորյանի «Մեր քաղաքը» դաշինքը ստացել է ձայների 15,5%-ը, Ռուբեն Մխիթարյանի «Իմ հզոր համայնք» կուսակցությունը ստացել է ձայների 8,08 %-ը, իսկ «Մայր Հայաստան» դաշինքը, որի առաջին համարը Կարեն Սիմոնյանն է, ստացել է ձայների 6,11%-ը։

Իշխանության թեկնածու Սարիկ Մինասյանը ստացել է ձայների 36,21%-ը: Ու թեև Մինասյանը ամենաշատ քվեներն է ստացել, քաղաքի կարավարումը չի կարող միանձյա ստանձնել, քանի որ դրա համար անհրաժեշտ էր հավաքել 50+ ձայն:

Արփի Հակոբյան