Քաղաքականություն
01.04.2025 | 10:41
Գերմանիայի նախագահականը ներողություն է խնդրել Ադրբեջանից նախագահ Ֆրանկ-Վալտեր Շտայնմայերի սոցցանցի պաշտոնական էջում Արցախի դրոշով արված հրապարակման համար։ Այս մասին հայտնում են ադրբեջանական լրատվամիջոցները։
Նշվում է, որ Գերմանիայի նախագահի աշխատակազմի ղեկավար, պետքարտուղար Դյորտե Դինգերի անունից ներողությամբ նամակ է հղվել Ադրբեջանի նախագահի օգնական Հիքմեթ Հաջիևին և թույլտվություն տրամադրվել, որ այն տարածվի լրատվամիջոցներով։
«Դաշնային նախագահի սոցցանցերում կարճ ժամանակով հրապարակվել են դրոշի սխալ պատկեր և դրան կից տեքստ, որը վերաբերում է Ադրբեջանի շրջաններից մեկին։ Սխալը հայտնաբերելուց հետո համապատասխան հրապարակումն անմիջապես հեռացվել է։ Գրառումը հրապարակվել է տեխնիկական սխալի արդյունքում և որևէ նշանակություն չունի Ադրբեջանի տարածքային ամբողջականության վերաբերյալ Գերմանիայի հայտնի դիրքորոշման շրջանակում։ Շատ եմ ցավում տեղի ունեցած սխալի համար և կցանկանայի իմ անկեղծ ներողությունները հայտնել այն սխալ տպավորության համար, որը նշյալ հրապարակումն ազդել է Ադրբեջանում որոշ մարդկանց վրա»,- ասվում է նամակում։
Նշվում է նաև, որ դաշնային նախագահի առաջիկա այցը Բաքու նպատակ ունի ամրապնդել ադրբեջանա-գերմանական գործընկերությունը և աջակցել տարածաշրջանում ընթացող խաղաղության գործընթացին։
Հիշեցնենք, որ Գերմանիայի նախագահ Ֆրանկ Վալտեր Շտայնմայերը սոցցանցի իր էջում Արցախի դրոշով հրապարակում էր արել, կարճ ժամանակ անց՝ հեռացրել։
Այնուհետև Բաքուն ԱԳՆ էր կանչել երկրում Գերմանիայի դեսպանին, խիստ բողոք հայտնել ու հրապարակային ներողություն պահանջել։ Ադրբեջանական իշխանամերձ աղբյուրներն էլ հայտարարել էին, որ ներողություն չխնդրելու դեպքում Գերմանիայի նախագահի Բաքու այցի նպատակահարմարությունը կասկածի տակ է դրվում։
Թարգմանությունը՝ Էմմա Չոբանյանի
