19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
«Մշակութային վերջին զանգի կազմակերպումը խրախուսվելու է». Արաքսիա Սվաջյան
28.03.2025 | 15:51
ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը մասնակցել է «Կամուրջ կրթության և մշակույթի միջև» խորագրով համահայկական ուսուցչական առցանց համաժողովին, որն անցկացրել է ԿԳՄՍ նախարարությունը։ Համաժողովում քննարկվել են մշակութային կրթության տարվա շրջանակում իրականացված կրթամշակութային ծրագրերը․ տեղեկացնում են գերատեսչությունից։
Նախարարության կողմից նախապես հայտարարված համաժողովին առցանց տարբերակով մասնակցել է ավելի քան հազար ուսուցիչ:
Ողջունելով ուսուցչական համաժողովի մասնակիցներին՝ Արաքսիա Սվաջյանը շնորհակալություն է հայտնել հետաքրքրության համար՝ նշելով, որ ԿԳՄՍ նախարարությունը 2024-2025 ուսումնական տարին հայտարարել է Մշակութային կրթության տարի։ Այս ընթացքում իրականացվել են մի շարք միջոցառումներ, ծրագրեր և մշակութային նախագծեր՝ տարբեր ձևաչափերով: Նախարարի տեղակալի խոսքով՝ նպատակը մշակութային կրթության խրախուսումն է:
«Դժվար է գտնել այն բաժանման գիծը, որտեղ կրթությունն ու մշակույթը հնարավոր կլինի առանձնացնել: Վստահ եմ՝ համաժողովի շրջանակում հնարավորություն կունենաք ծանոթանալու այս ընթացքում արձանագրված հաջողություններին և ստեղծված հնարավորություններին»,- ասել է Արաքսիա Սվաջյանը։ Նա, մասնավորապես, անդրադարձել է դպրոցական բաժանորդային համակարգին՝ նշելով, որ այս տարի այն առավել լայն ծավալներով է իրականացվել:
ԿԳՄՍ նախարարի տեղակալի խոսքով՝ ծրագիրը նպաստում է սովորողների համար կրթական գործընթացն ավելի հետաքրքիր դարձնելուն՝ նպաստելով մշակույթի միջոցով գիտելիքների վերարժևորմանը։
Արաքսիա Սվաջյանն անդրադարձել է նաև ավարտական դասարաններում նախատեսվող «Վերջին դաս» միջոցառմանը․ ակնկալվում է, որ ավանդական վերջին զանգի միջոցառումներն այս տարի կկազմակերպվեն մշակութային բովանդակությամբ: Մշակութային վերջին զանգի կազմակերպումը խրախուսելու նպատակով նախարարության կողմից նախատեսվում է նաև մրցույթի անցկացում։ Երևանում և մարզերում արդեն ձևավորված համապատասխան հանձնաժողովները, ուսումնասիրելով ներկայացված հայտերը, կընտրեն լավագույն միջոցառումները կազմակերպած դպրոցներին, որոնք էլ կպարգևատրվեն: Մրցույթին դպրոցի մասնակցությունը կամավորության սկզբունքով է:
«Իհարկե, հաղթող ճանաչելու գործընթացը պայմանական է, քանի որ իրականում մեր նպատակն է խթանել, որ «Վերջին դասն» իրապես դառնա առավել երեխայակենտրոն։ Միջոցառումը պետք է ապահովի երեխաների առավել մեծ մասնակցություն և պարունակի մշակութային շեշտադրումներ»,- ասել է Արաքսիա Սվաջյանը՝ տեղեկացնելով, որ նախարարությունը մշակել է նաև մշակութային վերջին զանգի կազմակերպման ուղեցույց:
ԿԳՄՍ նախարարի տեղակալը նաև տեղեկացրել է՝ ուսումնական տարվա ավարտին ևս մեկ ուսուցչական համաժողով է կազմակերպվելու, որի շրջանակում ամփոփվելու են նոր չափորոշչի ներդրման, ինչպես նաև մշակութային կրթության տարվա շրջանակում իրականացված աշխատանքները։
ԿԶՆԱԿ հիմնադրամի տնօրենի պաշտոնակատար Արտաշես Թորոսյանը ևս ողջունել է համաժողովի մասնակիցներին և ընդգծել՝ հանրակրթության պետական նոր չափորոշչով անցում է արվում կարողունակությունների ձևավորմանը միտված կրթության, որտեղ կարևոր են թե՛ գիտելիքը, թե՛ հմտությունը, թե՛ արժեքներն ու դիրքորոշումները:
«Մշակույթն ու արվեստն այդ կարողություններում կարմիր թելով անցնում են ողջ ուսումնառության ընթացքում: ԿԶՆԱԿ-ն ակտիվ տարածում է դպրոցներում կուտակված դրական փորձը, իսկ այս աշխատաժողովը ևս մեկ հարթակ է այդ փորձի տարածման համար»,- ասել է Արտաշես Թորոսյանը:
Համաժողովին մասնակցել են նաև Հայաստանի պատմության թանգարանի տնօրեն Դավիթ Պողոսյանը և Խ. Աբովյանի անվան հայկական պետական մանկավարժական համալսարանի թանգարանի տնօրեն Ալվարդ Գրիգորյանը։ Նրանք հանդես են եկել «Մշակույթի դերը ժամանակակից կրթության մեջ և ինչպես այն ինտեգրել կրթական ծրագրերում» խորագրով պլենար զեկույցներով: Բանախոսները կարևորել են նմանօրինակ քննարկումը՝ մշակութային կրթության հիմնահարցերն ու պետության կողմից գործադրված ջանքերն արժևորելու տեսանկյունից:
«Այս առանցքում շատ է կարևորվում կոնկրետ մշակութային կազմակերպությունների և դպրոցների կապը, որն ավելի շատ ուղղված է հանրակրթական խնդրի համալիր, այլ ոչ թե հատվածային լուծմանը: Ընդհանուր հանրային արժեհամակարգի տեսանկյունից սա շատ կարևոր սկզբունք է»,- ասել է Դավիթ Պողոսյանը:
Հայաստանի պատմության թանգարանի տնօրենը նշել է՝ վերջին ամիսներին թանգարանում գրանցվել են ռեկորդային այցելություններ հենց դպրոցական բաժանորդային ծրագրի շրջանակում: Մասնավորապես՝ 2-3 ամսվա ընթացքում ավելի քան 14 հազար դպրոցականներ են այցելել Հայաստանի պատմության թանգարան, որը ռեկորդային ցուցանիշ է առհասարակ թանգարանային այցելությունների առումով: Այս համատեքստում Դավիթ Պողոսյանն ընդգծել է նաև այցելությունների արդյունավետության և գործընթացն առավել նպատակային դարձնելու հարցը:
Համաժողովի ընթացքում կարևորվել է դպրոցներում մշակութային նախագծերի իրականացումը․ մասնավորապես՝ քննարկվել են, ուսուցիչների մասնագիտական զարգացմանն ու առաջնորդությանը, ուսուցչական համայնքների ձևավորմանն ու փորձի փոխանակմանը վերաբերող հարցեր:
