Պուտինն ու Էրդողանը հեռախոսազրույց են ունեցել

Թուրքիայի նախագահ Ռեջեփ Թայիփ Էրդողան ու ՌԴ նախագահ Վլադիմիր Պուտինը հեռախոսազրույց են ունեցել։ Թուրքական կողմի հաղորդմամբ՝ զրույցի  ընթացքում քննարկվել են Թուրքիայի և Ռուսաստանի երկկողմ հարաբերությունները, տարածաշրջանային և գլոբալ հարցեր։

Էրդողանը հանդիպման ժամանակ հայտարարել է, որ Թուրքիայի և Ռուսաստանի համագործակցությունն առանցքային նշանակություն ունի տարածաշրջանային խնդիրների լուծման համար, որ Անկարան ուշադրությամբ հետևում է Ռուսաստանի և Ուկրաինայի միջև ընթացող պատերազմին վերջ տալու նախաձեռնված գործընթացին և որ  պատրաստ է բոլոր հնարավոր աջակցությունը, ներառյալ՝ խաղաղ բանակցությունների կազմակերպումը, տևական խաղաղություն ապահովելու համար։

Թուրքիայի նախագահը նաև նշել է, որ Սև ծովում առևտրային նավարկության անվտանգության համար ձեռնարկվելիք բարեխիղճ քայլերը կնպաստեն խաղաղության գործընթացին, և որ Անկարան շարունակում է անել իր բաժինը, որպեսզի Սև ծովը չվերածվի հակամարտության գոտու։

«Նախագահ Էրդողանը նշել է, որ Թուրքիան մեծ նշանակություն է տալիս սիրիական հարցում Ռուսաստանի հետ համագործակցությանը, կարևոր է, որ Թուրքիան և Ռուսաստանը միասին աշխատեն, որպեսզի Սիրիան հասնի  տևական խաղաղության և կայունության՝ հիմնված իր տարածքային ամբողջականության վրա, և որ Թուրքիան և Ռուսաստանը կարող են միասին աշխատել՝ վերջ դնելու Սիրիայի միասնությունը խաթարելու, էթնիկ և կրոնական խտրականությունը հրահրելու փորձերին և ամբողջությամբ վերացնել Սիրիայի դեմ պատժամիջոցները»,- ասվում է հաղորդագրության մեջ։

Թարգմանությունը՝ Էմմա Չոբանյանի