15.07.2026 | 13:45
Իրանը հայտնում է, որ ԱՄՆ հարվածների հետևանքով 7 զինծառայող և առնվազն 30 քաղաքացիական անձ է զոհվել
«Անչափահաս երեխաների մորը տարել են Հակակոռուպցիոն կոմիտե»․ «Մայր Հայաստան» դաշինքի Գյումրիի գրասենյակը խուզարկել են
Հասարակություն
27.03.2025 | 12:08
«Գյումրիի քաղաքապետի «Մայր Հայաստան» դաշինքի թեկնածու Կարեն Սիմոնյանն այսօր պետք է հարցազրույցի գար Երևանում, սակայն դաշինքի գրասենյակում խուզարկության պատճառով ստիպված է հետաձգել այն»,- այս մասին ֆեյսբուքյան ուղիղ եթերի միջոցով հայտնեց գրասենյակում գտնվող Անդրանիկ Թևանյանը՝ իրավապահների գործողությունները որակելով որպես ընտրություններից առաջ իրենց «քարոզարշավի խոչընդոտ» և «քաղաքական հետապնդում»։
«Մեր թիմակից Էմմա Գրգորյանին են տարել ոստիկանություն շտաբի աշխատանքներն են պարալիզացրել»,- ասաց Թևանյանը՝ նշելով, որ վաղ առավոտյան էլ իրենց գրասենյակի աշխատակից Արա Ոսկանյանի բնակարանում են խուզարկություն իրականացրել։
Թևանյանը նշեց, որ իրենք այսօր երեկոյան, ժամը 17։00-ին նաև իրենք հանրահավաք են հրավիրել, և իրավապահների գործողությունների պատճառով խոչընդոտվում է նաև հանրահավաքի նախապատրաստական աշխատանքները։
Ավելի ուշ արդեն լրագրողների հետ զրույցում քաղաքապետի թեկնածու Կարեն Սիմոնյանը հայտնեց, որ իրենց թիմակից Էմմա Գրիգորյանին անչափահաս երեխաների ներկայությամբ են տնից տարել ոստիկանություն, իսկ այժմ էլ Գյումրիից տարել են Հակակոռուպցիոն կոմիտե։
Ավելի վաղ հաղորդել էինք, որ Հակակոռուպցիոն կոմիտեն հայտնում է ընտրակաշառքի վերաբերյալ հաղորդումների մասին։ Factor.am-ի տեղեկություններով խուզարկությունները կապված են հենց այդ հաղորդումների հետ։
Արաքս Մամուլյան
