Բաքուն Երևանին կոչ է անում «արագացնել և բաց չթողնել» խաղաղության պայմանագրի կնքման հնարավորությունը

Ադրբեջանական կողմը Երևանին կոչ է անում արագացնել խաղաղության համաձայնագրի ստորագրման գործընթացը և նշում, որ այդ հնարավորությունը հավերժ չի լինելու։ Ադրբեջանական լրատվամիջոցների հաղորդմամբ՝ այս մասին հայտարարել է Արգենտինայում գտնվող Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։

«Հայաստանին դրդող գործոններից մեկը՝ գնալ համաձայնությանը, այն է, որ այդ հնարավորությունը հավերժ չի լինի, և սխալ կլինի այն բաց թողնել»,- ասել է Ամիրբեկովը։

Նա նշել է, թե Բաքվի ու Երևանի միջև խաղաղության համաձայնագրի տեքստի շուրջ այս ամիս ավարտված բանակցությունները ճանապարհ են բացում հարաբերությունների կարգավորման և դիվանագիտական ​​կապերի հաստատման համար , միաժամանակ, շարունակել Բաքվի նախապայմանները առաջ քաշել։ Ամիրբելովն ասել է՝ «դա անելու համար Հայաստանը պետք է փոփոխություններ կատարի իր Սահմանադրությունում, հրաժարվի տարածքային պահանջներից և դուրս բերի օտար ուժերը սահմանամերձ տարածքներից»։

«Այս համաձայնագիրը ոչ թե վերջն է, այլ սկիզբը։ Խաղաղությունը կառուցվում է ոչ թե հայտարարությունների, այլ կոնկրետ քայլերի վրա»,- նշել է Ալիևի ներկայացուցիչը։

Ալիևի ներկայացուցիչը նշել է, որ հարցը չի կարելի դիտարկել կողմերից միայն մեկի տեսանկյունից։ Նրա խոսքով՝ «կարևոր է հաշվի առնել Ադրբեջանի դիրքորոշումը, հատկապես, տարածքային ամբողջականության սկզբունքի լույսի ներքո, որը Արգենտինան պաշտպանում է Մալվինյան կղզիների շուրջ վեճի համատեքստում»։

«Մենք ցանկանում ենք Արգենտինայի հանրությանը հասցնել Ադրբեջանի տեսակետը, որպեսզի նրա որոշումը կամ դատողությունը հիմնված չլինի միայն մի կողմի դիրքորոշման վրա»,- հայտարարել է Ամիրբեկովը։

Հավելենք, որ Ալիևի ներկայացուցիչը նմանատիպ հայտարարություններ էր հնչեցրել նաև բրազիլական լրատվամիջոցի հետ զրույցում։

Թարգմանությունը՝ Էմմա Չոբանյանի