22.06.2026 | 04:06
ԱԱ-2026. Ուրուգվայ – Կաբո Վերդե` 2:2. ՏԵՍԱՆՅՈՒԹ
Անկարան հայտնում է, որ Ռուբիոն ու Ֆիդանը քննարկել են Հայաստանի ու Ադրբեջանի միջև խաղաղության գործընթացը
Քաղաքականություն
26.03.2025 | 11:01
Արդեն հայտնել ենք, որ Վաշինգտոնում տեղի է ունեցել ԱՄՆ պետքարտուղար Մարկո Ռուբիոյի ու Թուրքիայի ԱԳ նախարար Հաքան Ֆիդանի հանդիպումը։ Սա ԱՄՆ նախագահ Դոնալդ Թրամփի վարչակազմի օրոք Թուրքիայի առաջին բարձրաստիճան պաշտոնյայի այցն է Վաշինգտոն։
Թուրքական լրատվամիջոցները, վկայակոչելով ԱԳՆ դիվանագիտական աղբյուրներին, հայտնում են, որ Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի օրերս տեղի ունեցած հեռախոսազրույցի ընթացքում քննարկված հարցերը շարունակվել են դիտարկվել Վաշինգտոնում Ֆիդանի և Ռուբիոյի հանդիպման ժամանակ։
Աղբյուրները նշում են, որ քննարկվել են երկու պետություների ղեկավարների առաջիկա այցերը, քննարկվել է Ադրբեջանի և Հայաստանի միջև խաղաղության գործընթացը։
Հաղորդվում է, որ երկու կողմերն էլ հստակորեն դրսևորել են իրենց քաղաքական կամքը պաշտպանական արդյունաբերության ոլորտում համագործակցության խոչընդոտները վերացնելու համար, և որ երկու կողմերի միջև տեխնիկական բանակցություններ կանցկացվեն առկա խնդիրները լուծելու համար։ Նրանք նաև ընդգծել են սիրիական վարչակազմի հետ փոխգործակցության կարևորությունը և իրենց վճռականությունը հայտնել Սիրիայում կայունություն ապահովելու և ահաբեկչության դեմ պայքարելու հարցում։
Ֆիդանը Ռուբիոյին փոխանցել է, որ Գազայում պետք է մշտական հրադադար հաստատվի՝ ընդգծելով այդ խնդրի կարևորությունը տարածաշրջանային խաղաղության համար։ Աղբյուրները հայտնում են, որ քննարկվել են Ռուսաստանի և Ուկրաինայի միջև հրադադարի հաստատմանն ուղղված ջանքերը, և որ Թուրքիան աջակցում է այս հարցում ԱՄՆ-ի կողմից ձեռնարկվող ջանքերին։
ԱՄՆ Պետդետքարտուղարությունն էլ իր տարածած հաղորդագրության մեջ հայտնել է, որ Մարկո Ռուբիոն Թուրքիայի ԱԳ նախարարին խնդրել է աջակցել Ուկրաինայում ու Հարավային Կովկասում խաղաղության հաստատմանը։
Թարգմանությունը՝ Էմմա Չոբանյանի
