08.09.2026 | 21:37
ԱՄՆ-ի ու Կանադայի առևտրային բախման ֆոնին՝ ուժի մեջ են մտել կանադական կողմի պատասխան մաքսատուրքերը
Ադրբեջանի ԱԳՆ-ն արձագանքել է Արարատ Միրզոյանի` Բաքվի նոր պայմանների մասին հայտարարություններին
Քաղաքականություն
25.03.2025 | 19:51
Ադրբեջանի ԱԳՆ մամուլի խոսնակ Այխան Հաջիզադեն արձագանքել է Հայաստանի ԱԳ նախարար Արարատ Միրզոյանի՝ Իրանի արտգործնախարար Սեյեդ Աբբաս Արաղչիի հետ համատեղ ասուլիսում հնչեցրած հայտարարություններին։
Բաքուն նշում է, թե Արարատ Միրզոյանի պնդումները, որ Ադրբեջանը խաղաղության պայմանագրի տեքստի շուրջ համաձայնություն ձեռք բերելուց հետո նոր պայմաններ է առաջադրում, իբր, «լիովին անհիմն են»։
«Հայաստանի արտգործնախարարը քաջատեղյակ է, որ Հայաստանի Սահմանադրության այն կետի հեռացումը, որը դեմ է Ադրբեջանի տարածքային ամբողջականությանը և ինքնիշխանությանը, ինչպես նաև Մինսկի խմբի պաշտոնական լուծարման պահանջը, վերջին երկուսուկես տարիների ընթացքում եղել է բանակցային գործընթացի կարևոր թեմաներից մեկը։ 2023 թվականի մայիսին Վաշինգտոնում կայացած հանդիպման ժամանակ հայկական կողմին ներկայացվել են Սահմանադրությամբ, ազգային օրենսդրությամբ և Հայաստանի իրավական պահանջներով ամրագրված փաստերը, որոնք տարածքային պահանջներ են պարունակում Ադրբեջանի նկատմամբ։ Այս մասին ամբողջությամբ տեղեկացված են նաև երրորդ երկրները»,- ասվում է հայտարարության մեջ։
Նշվում է, թե հայկական կողմի պնդումները, որ Ադրբեջանը հենց նոր է առաջ քաշել այդ պայմանները, իբր, «նպատակ ունեն մոլորեցնել միջազգային հանրությանը, և այդ մարտավարությունն արդյունք չի տա»։
«Եթե հայկական կողմը շահագրգռված է խաղաղության պայմանագրի ստորագրմամբ, ապա պետք է առանց ժամանակ կորցնելու փոփոխություններ անի Սահմանադրության մեջ, հրաժարվի Ադրբեջանի նկատմամբ տարածքային պահանջներից և չհրաժարվի Մինսկի խմբի պաշտոնական վերացման ուղղությամբ համագործակցությունից»,- հայտարարում է Ադրբեջանի ԱԳՆ ներկայացուցիչը։
Թարգմանությունը՝ Էմմա Չոբանյանի
