16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Ռիադում ԱՄՆ-ՌԴ բանակցությունների բովանդակությունը չի հրապարակվելու․ Պեսկով
Քաղաքականություն
25.03.2025 | 15:51
Ռուս-ամերիկյան բանակցությունների բովանդակությունը, որոնք կայացել են նախօրեին Էր Ռիադում, լայն հանրությանը չի ներկայացվելու։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Խոսքը տեխնիկական բանակցությունների մասին է։ Դրանք բանակցություններ են՝ մանրուքների մեջ խորը ընկղմամբ, այնպես որ, իհարկե, այդ բանակցությունների բովանդակությունը հաստատ չի հրապարակվի, դրան սպասել պետք չէ»,- ասել է Պեսկովը՝ հավելելով․ «Մայրաքաղաքներում արված զեկույցները ներկայումս վերլուծության փուլում են, միայն այդ դեպքում հնարավոր կլինի խոսել ինչ-որ փոխըմբռնման մասին»։
Հիշեցնենք, որ Էր Ռիադում ռուս-ամերիկյան խորհրդակցություններն ավարտվել էին մարտի 24-ի երեկոյան, դրանք տևել էին ավելի քան 12 ժամ։ ՌԴ ԱԳՆ խոսնակ Մարիա Զախարովան հայտնել է, որ արտգործնախարար Սերգեյ Լավրովը երեքշաբթի ռուսական Առաջին ալիքին տված հարցազրույցում կխոսի այդ բանակցությունների որոշ ասպեկտների մասին։
Ավելի վաղ տարբեր լրատվամիջոցներ տեղեկություններ էին հայտնել, որ կողմերը բանակցությունների արդյունքներով համատեղ հայտարարություն են հրապարակելու։ Բանակցություններին մասնակցած ռուս սենատոր Գրիգորի Կարասինն էլ հայտնել էր, որ հանդիպման պաշտոնական արդյունքները սպասվում են երեքշաբթի ավելի ուշ։
«Ամեն ինչ քննարկվել է, եղել է հարուստ, բարդ երկխոսություն, բայց դա շատ օգտակար է եղել մեզ և ամերիկացիների համար»,- ասել է նա։
Ըստ Կարասինի՝ «ամեն ինչ չէ, որ որոշել են, ամեն ինչի մասին չէ, որ համաձայնել են», բայց խոսակցությունն ինքնին «ժամանակին» էր՝ հաշվի առնելով ԱՄՆ նոր վարչակազմը և «փորձագիտական խմբերի հանդիպմանը եկած նոր քաղաքական գործիչներին»։
«Ընդհանուր առմամբ, տպավորություն է կառուցողական երկխոսության, որն անհրաժեշտ է։ Դրանով հետաքրքրված են նաև ամերիկացիները»,- ասել է նա։
Թարգմանությունը՝ Էմմա Չոբանյանի
