17.07.2026 | 16:27
Շատիվանքի Սբ․ Սիոն եկեղեցու 17-րդ դարի որմնանկարների վերականգնման ընթացքում բացահայտվել են միջնադարյան նոր պատկերներ
ԱՄՆ-ի և ՌԴ-ի բանակցություններն ավելի քան 12 ժամ են տևել․ կողմերը համատեղ հայտարարություն կանեն
Քաղաքականություն
25.03.2025 | 10:57
Ռուսաստանի և ԱՄՆ-ի պատվիրակությունների՝ մարտի 24-ին Սաուդյան Արաբիայի մայրաքաղաք Էր Ռիադում անցկացված բանակցությունններն ավելի քան 12 ժամ են տևել, գրում է Meduza-ն։
Հանդիպման արդյունքներով կողմերի համատեղ հայտարարությունը հրապարակվելու է այսօր։
Ռուսական պատվիրակության անդամներից Դաշնության խորհրդի արտաքին հարաբերությունների հանձնաժողովի ղեկավար Գրիգորի Կարասինը նշել է, որ բազմաթիվ խնդիրներ են քննարկվել՝ երկխոսությունը բարդ, բայց օգտակար բնորոշելով։
ՌԴ ԱԳՆ պաշտոնական ներկայացուցիչ Մարիա Զախարովան էլ հայտնել է, որ ԱԳ նախարար Սերգեյ Լավրովն այսօր հեռուստատեսային հարցազրույցում կպատմի հանդիպման ասպեկտների մասին։
Reuters-ը, վկայակոչելով Սպիտակ տան աղբյուրին, հայտնում է, որ Ռիադում տեղի ունեցած բանակցություններից հետո «առաջիկայում» «դրական հայտարարություն» է սպասվում։ Ըստ լրատվամիջոցի զրուցակցի՝ բանակցություններում «առաջընթաց է նկատվում»։ Ռուսական աղբյուրը Reuters-ին հայտնել է, որ համատեղ հայտարարության նախագիծն ուղարկվել է Մոսկվա և Վաշինգտոն՝ հաստատման համար։
Ըստ CBS News-ի երկու աղբյուրների՝ ԱՄՆ տեխնիկական թիմի կողմից Թրամփի վարչակազմին տրամադրված զեկույցները «լավատեսական են թվում»: Աղբյուրներից մեկն ասել է, որ ուկրաինացի պաշտոնյաները նույնպես տեղեկացվել են բանակցությունների արդյունքների մասին։
Թարգմանությունը՝ Էմմա Չոբանյանի
