13.01.2026 | 16:48
Իրանցի պաշտոնյան հայտարարել է անկարգությունների ընթացքում շուրջ 2000 զոհի մասին
Կանադայի վարչապետը Թրամփի սպառնալիքների ֆոնին ապրիլի 28-ին արտահերթ ընտրություններ է նշանակել
Քաղաքականություն
24.03.2025 | 11:35
Կանադայի խորհրդարանի արտահերթ ընտրությունները տեղի կունենան ապրիլի 28-ին: Այս մասին հայտարարել է երկրի նոր վարչապետ Մարկ Քարնին, գրում է Current time-ը։
Այս որոշումն սպասելի էր. ընտրությունների անցկացման անհրաժեշտության մասին դեռ հունվարին հայտարարել էր կառավարության նախկին ղեկավար Ջասթին Թրյուդոն՝ հայտարարելով վարչապետի պաշտոնից հրաժարականի մասին։ Մարտի 10-ին Քարնին ընտրվել էր իշխող Լիբերալ կուսակցության նոր առաջնորդ, այնուհետև փոխարինել Թրյուդոյին վարչապետի պաշտոնում:
Կիրակի Քարնին հայտարարել է, որ կառաջադրվի վարչապետի պաշտոնում, քանի որ իրեն «ուժեղ մանդատ» է պետք ԱՄՆ նախագահ Դոնալդ Թրամփի վարչակազմի հետ առճակատման պայմաններում:
«Մենք բախվում ենք մեր կյանքի ամենակարևոր ճգնաժամին՝ կապված ԱՄՆ նախագահ Դոնալդ Թրամփի չարդարացված առևտրային միջոցների և մեր ինքնիշխանությանն ուղղված սպառնալիքների հետ։ Թրամփը ցանկանում է կոտրել մեզ, որպեսզի ԱՄՆ-ը կարողանա մեզ տիրել»,- ասել է նա։
Խոսքը ԱՄՆ-ի կողմից կանադական ապրանքների համար մաքսատուրքերի սահմանման, ինչպես նաև Թրամփի այն պնդումների մասին է, թե Կանադան կարող է դառնալ «ԱՄՆ 51-րդ նահանգը»։
Թրյուդոն իր հրաժարականի մասին հայտարարել էր իշխող Լիբերալ կուսակցության ժողովրդականության անկման ֆոնին: Պահպանողականներն առաջատար էին հարցումներով և պայքարում էին ընտրություններում հաղթելու համար: Թրամփի սպառնալիքները և լիբերալների ղեկավարության փոփոխությունը, այնուամենայնիվ, հանգեցրել են նրան, որ Լիբերալ կուսակցությունը հարցումներում սկսել է մի քանի տոկոսային կետով առաջ անցնել պահպանողականներից:
Թարգմանությունը՝ Էմմա Չոբանյանի
