Քաղաքականություն
17.03.2025 | 11:40
Պաշտոնական այցով Բաքվում գտնվող ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն հանդիպել է Ադրբեջանի առաջին փոխնախագահ Մեհրիբան Ալիևային։ Ադրբեջանական լրատվամիջոցների հաղորդմամբ՝ վերջինը նշել է, որ Մատվիենկոյի այցը Ադրբեջան կնպաստի երկու պետությունների միջև միջխորհրդարանական հարաբերությունների զարգացմանը։
Մատվիենկոն իր հերթին ընդգծել է միջխորհրդարանական հարաբերությունների և խորհրդարանական պատվիրակությունների փոխայցելությունների կարևորությունը երկրների միջև բարեկամական հարաբերությունների ամրապնդման գործում։
Հանդիպման ընթացքում նշվել է, որ Ադրբեջանի և Ռուսաստանի հարաբերությունները կրում են ռազմավարական դաշնակցային բնույթ, մտքերի փոխանակում է տեղի ունեցել երկկողմ մշակութային և հումանիտար համագործակցության հարցերի շուրջ։
Վալենտինա Մատվիենկոն այսօր հանդիպել է նաև Ադրբեջանի նախագահ Իլհամ Ալիևին։ Հանդիպումից մանրամասներ դեռևս չեն հաղորդվում։
Հավելենք, որ սա ՌԴ բարձրաստիճան պաշտոնյայի առաջին այցն է Ադրբեջան՝ Բաքվի և Մոսկվայի հարաբերությունների լարվածության ֆոնին, որն առաջացել է ադրբեջանական օդանավի կործանումից հետո։ Ավիաղետի համար Ադրբեջանը մեղադրում է ռուսական կողմին՝ պահանջելով պաշտոնապես ներողություն խնդրել և պատասխանատվություն ստանձել։ Բացի այդ, Ադրբեջանը վերջերս փակել է Բաքվում «Ռուսական տունը», ապա նաև Sputnik-ի ադրբեջանական ծառայությունը։
Թարգմանությունը՝ Էմմա Չոբանյանի
