04.10.2026 | 22:31
Եղիշե Մելիքյանը և Իգոչուկվու Իվուն՝ Չեռնոգորիայի հավաքականի դեմ խաղի մասին. ՏԵՍԱՆՅՈՒԹ
Ադրբեջանի ՊՆ կոլեգիայի նիստում քննարկվել է Հայաստանի հետ սահմանին օպերատիվ իրավիճակը
Քաղաքականություն
24.02.2025 | 13:42
Ադրբեջանի պաշտպանության նախարար Զաքիր Հասանովի գլխավորությամբ տեղի է ունեցել ՊՆ կոլեգիայի նիստ, քննարկվե են 2024 թվականի արդյունքները։ Ադրբեջանական լրատվամիջոցները, վկայակոչելով ՊՆ-ին, հայտնում են, որ նիստին մասնակցել են նախարարի տեղակալները, զինված ուժերի տարբեր զորքերի հրամանատարները, առանձին համազորային բանակի հրամանատարը, Պաշտպանության ազգային համալսարանի ռեկտորը, գլխավոր վարչությունների, վարչությունների, ռազմական միավորումների և կազմավորումների հրամանատարները։
Նշվում է, որ Հասանովն ընդգծել է «երկրի պաշտպանական հզորության կարևորությունը միջազգային ասպարեզում Ադրբեջանի հեղինակության բարձրացման և տարածաշրջանը համաշխարհային ուժի կենտրոնի վերածելու գործում, նաև մանրամասն խոսել ընթացիկ տարվա բանակաշինության ծրագրերի մասին»։ Հասանովը նշել է, թե «հաջողությամբ շարունակվում են երկրի տարածքային ամբողջականության և ռազմական անվտանգության ապահովման, զորքերի մարտական հնարավորության ու մարտունակության բարձրացման, ադրբեջանական բանակի զինանոցում նորագույն տեխնոլոգիաներով արտադրված ժամանակակից սպառազինության համակարգերի ընդունման միջոցառումները»։
«Վերլուծվել է ադրբեջանա-հայկական պայմանական սահմանին տիրող օպերատիվ իրավիճակը և 2024 թվականի ընթացքում ադրբեջանական բանակի ծառայողական ու մարտական գործողությունները»,- ասվում է հաղորդագրության մեջ։
Ընդգծվել է նաև, որ ադրբեջանական բանակի զինծառայողները մասնակցել են 20 երկկողմ և բազմակողմ զորավարժությունների։ Նշվել է, որ միջազգային համագործակցությունը ռազմական, ռազմատեխնիկական և ռազմակրթական ոլորտներում ու համատեղ վարժանքները նշանակալի ներդրում ունեն տարածաշրջանում կայուն խաղաղության և անվտանգության ապահովման գործում։
Անդրադառնալով 2025 թվականին նախատեսված միջոցառումներին՝ Հասանովը ևս մեկ անգամ կարևորել է անձնակազմի պրոֆեսիոնալիզմի և զորքերի մարտական պատրաստվածության մակարդակի, այդ թվում՝ զորավարժությունների և դաշտային պատրաստության արդյունավետության բարձրացմանն ուշադրություն դարձնելու կարևորությունը։
«Տրվել են համապատասխան հանձնարարականներ՝ պայմանական պետական սահմանին մարտական հերթապահություն կազմակերպելու, անվտանգության կանոնների խստիվ պահպանման, զգոնությունը բարձրացնելու, հակառակորդի գործողությունների շարունակական հսկողությունն ու վերահսկողությունն առավել ուժեղացնելու ուղղությամբ»,- ասվում է հաղորդագրության մեջ։
Թարգմանությունը՝ Էմմա Չոբանյանի
