21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Եվրոպան դեմ է Ուկրաինայում հրադադարին՝ առանց խաղաղության պայմանագրի
Քաղաքականություն
18.02.2025 | 12:54
Ֆրանսիայի, Գերմանիայի, Մեծ Բրիտանիայի, Լեհաստանի, Իտալիայի, Իսպանիայի և Դանիայի ղեկավարները Փարիզում հրավիրված արտակարգ գագաթնաժողովում հաստատել են, որ պատրաստ են ապագայում Ուկրաինային անվտանգության երաշխիքներ տրամադրել, գրում է DW-ի ռուսական ծառայությունը:
Սակայն Եվրոպայի հետագա քայլերն այս հարցում կախված կլինեն ԱՄՆ-ի գործողություններից, հայտնել է Reuters գործակալությունը՝ վկայակոչելով Փարիզի հանդիպման քննարկման թեմաներին ծանոթ եվրոպացի դիվանագետներից մեկին։
«Մենք պատրաստ ենք տրամադրել անվտանգության երաշխիքներ, որոնց պայմանները կքննարկվեն կողմերից յուրաքանչյուրի հետ՝ կախված ամերիկյան աջակցության մակարդակից»,- նշել է գործակալության աղբյուրը։
Դիվանագետի խոսքով՝ եվրոպացի առաջնորդները նաև ուշադրություն են հրավիրել Ուկրաինայում կրակի դադարեցման հնարավոր համաձայնագրի վտանգի վրա, եթե դա արվի առանց ամբողջական խաղաղության համաձայնագրերի ստորագրման։
Փարիզի գագաթնաժողովի գլխավոր թեման հարցն էր, թե ինչպես պետք է Եվրոպան արձագանքի Ուկրաինայի նկատմամբ ԱՄՆ քաղաքականության կտրուկ փոփոխությանը։ Դոնալդ Թրամփի վարչակազմի ներկայացուցիչները Կրեմլի հետ սկսել են ուղղակիորեն քննարկել Ուկրաինայի դեմ ռուսական պատերազմի ավարտը՝ առանց այդ մասին Կիևին ծանուցելու, իսկ Վաշինգտոնի առաջարկած պայմաններն ուկրաինական հազվագյուտ հողային մետաղների նկատմամբ վերահսկողության համար չեն ներառում երկրի անվտանգության երաշխիքները։
Գագաթնաժողովից հետո պաշտոնական հայտարարություններ չեն արվել, սակայն դրա մասնակիցներն ավելի ուշ մեկնաբանություններ են տվել լրատվամիջոցներին։ Այսպես, Լեհաստանի վարչապետ Դոնալդ Տուսկը հայտարարել է, որ հանդիպման բոլոր մասնակիցները «նման տեսակետներ» ունեն ներկա իրավիճակի վերաբերյալ, սակայն չի հստակեցրել, թե ինչ է քննարկվում։
Իր հերթին, Մեծ Բրիտանիայի պաշտպանության նախարար Քիր Սթարմերը կոչ է արել ԵՄ երկրներին «ընդունել, որ մտնում ենք նոր դարաշրջան և դադարել անհույս կերպով կառչել անցյալի հարմարավետությունից»:
«Ժամանակն է, որ մենք պատասխանատվություն ստանձնենք մեր անվտանգության, մեր մայրցամաքի համար»,- ասել է բրիտանացի պաշտոնյան։
Այնուամենայնիվ, Կիևը Վաշինգտոնի հետագա աջակցության կարիքն ունի, նշել է նա, «քանի որ միայն ԱՄՆ անվտանգության երաշխիքները կարող են արդյունավետորեն հետ պահել Ռուսաստանին Ուկրաինայի վրա նոր հարձակումից»:
Թարգմանությունը՝ Տաթև Ֆռանգյանի
