13.01.2026 | 10:05
Լարս ավտոճանապարհը փակ է բոլոր տեսակի տրանսպորտային միջոցների համար
Իրանի ԱԳ նախարարը քննադատել է Թրամփի հակաիրանական հայտարարությունները
Քաղաքականություն
14.05.2025 | 22:24
Իրանի արտաքին գործերի նախարար Աբբաս Արաղչին կտրուկ քննադատել է ԱՄՆ նախագահ Դոնալդ Թրամփի վերջին հայտարարությունները Թեհրանի դեմ՝ Վաշինգտոնին մեղադրելով Իրանի դեմ տասնամյակներ շարունակ իրականացված դիվերսիաների և տարածաշրջանում Իսրայելի հանցագործությունները «սպիտակեցնելու» մեջ, գրում է Mehr-ը։
Կառավարության նիստից հետո լրագրողների հետ զրույցում Արաղչին արձագանքել է ԱՄՆ նախագահ Դոնալդ Թրամփի վերջին արտահայտություններին, որը Իրանին «մեղադրել է տարածաշրջանում անապահովության, անկայունության ապահովման մեջ»։
«Ես լսեցի ԱՄՆ նախագահի խոսքերը։ Դժբախտաբար, ներկայացվեցին կեղծ նարատիվներ։ Հենց Միացյալ Նահանգներն է վերջին քառասուն տարուց ավելի պատժամիջոցների, ինչպես նաև ռազմական և ոչ ռազմական ճնշումներ ու սպառնալիքներ կիրառել, որոնք խոչընդոտել են իրանական ազգի առաջընթացը։ Իրանի տնտեսական դժվարությունների իրական պատասխանատուն Ամերիկան է և նրա գերիշխող քաղաքականությունը, որը պարտադրվել է մեր ժողովրդին։ Այն փաստը, որ ԱՄՆ-ն աչք է փակում Իսրայելի սպառնալիքների և տարածաշրջանում Իսրայելի բոլոր հանցագործությունների վրա՝ փորձելով Իրանին ներկայացնել որպես սպառնալիք, մաքուր խաբեություն է։ Դա միտումնավոր փորձ է՝ աղավաղելու իրական ագրեսորի ինքնությունը»,- հայտարարել է Արաղչին։
Սաուդյան Արաբիայում կայացած ֆորումի ժամանակ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները պատրաստ է շարունակել բարելավել հարաբերությունները Իրանի հետ, նույնիսկ դատապարտել Թեհրանի գործողությունները, որոնք անցյալում «հանգեցրել են ճգնաժամի ամբողջ տարածաշրջանում»։
«Ես ուզում եմ գործարք կնքել Իրանի հետ։ Եթե մենք կարողանանք դա անել, ես շատ ուրախ կլինեմ, Մերձավոր Արևելքը և աշխարհը կդառնան ավելի անվտանգ վայր»,- ասել էր Թրամփը։
Նա նշել է, որ եթե Իրանի ղեկավարությունը համաձայնության չգա, Միացյալ Նահանգներն այլընտրանք չի ունենա, քան շարունակել առավելագույն ճնշման քաղաքականությունը և ձգտել իրանական նավթի արտահանումը զրոյի հասցնել։ Թրամփը նաև կոչ է արել Իրանին դադարեցնել Մերձավոր Արևելքում զինյալ խմբավորումներին աջակցությունը։ Ըստ նրա՝ Իրանը պետք է նաև «մշտապես և հավաստիորեն դադարեցնի միջուկային զենք ձեռք բերելու ձգտումը»։
Հավելենք, որ Իրանի և ԱՄՆ-ի միջև բանակցությունների հաջորդ փուլը Թեհրանի միջուկային ծրագրի շուրջ վեճերը լուծելու համար, ըստ բանակցությունների միջնորդ Օմանի, տեղի կունենա առաջիկա օրերին՝ երկու կողմերի համապատասխան մայրաքաղաքների հետ խորհրդակցություններից հետո։ Մինչ այդ, Օմանում տեղի էր ունեցել ԱՄՆ-ի և Իրանի միջև անուղղակի բանակցությունների չորրորդ փուլը։
Թարգմանությունը՝ Էմմա Չոբանյանի
