21.12.2025 | 12:17
Պակիստանի նախկին վարչապետ Իմրան Խանը և նրա կինը դատապարտվել են 17 տարվա ազատազրկման
Հաքան Ֆիդանն Ուկրաինայի ԱԳ նախարարի հետ քննարկել է Զելենսկիի՝ Թուրքիա սպասվող այցը
Քաղաքականություն
14.05.2025 | 23:14
Թուրքիայի արտաքին գործերի նախարար Հաքան Ֆիդանն Անթալիայում ՆԱՏՕ-ի արտաքին գործերի նախարարների ոչ պաշտոնական հանդիպման շրջանակում հանդիպել է Ուկրաինայի արտաքին գործերի նախարար Անդրեյ Սիբիհայի հետ։ Թուրքական լրատվամիջոցները, ԱԳՆ աղբյուրներին վկայակոչելով, հայտնում են, որ հանդիպմանը քննարկվել են Ուկրաինայի և Ռուսաստանի միջև հրադադարի հաստատման և երկարատև խաղաղության հաստատման ջանքերը։
Ֆիդանը նշել է, որ Թուրքիան պատրաստ է ցուցաբերել ցանկացած աջակցություն, այդ թվում՝ միջնորդություն և բանակցությունները հյուրընկալել՝ Ուկրաինայում խաղաղության հասնելու համար։
Կողմերը քննարկել են նաև Ուկրաինայի նախագահ Վլադիմիր Զելենսկիի Թուրքիա կատարելիք այցի նախապատրաստական աշխատանքները։
Իր հերթին, Սիբիհան X-ում հայտնել է, որ Ֆիդանին տեղեկացրել է մարտադաշտում և դիվանագիտության մեջ վերջին զարգացումների մասին։
«Համաշխարհային դիվանագիտության էպիկենտրոնն այժմ գտնվում է Թուրքիայում, որն ակտիվ միջնորդական դեր է խաղում։ Մենք գնահատում ենք դա: Ես վերահաստատեցի Ուկրաինայի հանձնառությունը խաղաղությանը, մեր անհապաղ և անվերապահ պատրաստակամությունը լիարժեք և կայուն հրադադարի համար, ինչպես նաև մեր առաջարկը Ուկրաինայի և Ռուսաստանի միջև ամենաբարձր մակարդակի ուղիղ հանդիպման վերաբերյալ։ Պուտինը պետք է դադարեցնի հրադադարը մերժելը և նախագահ Զելենսկիի հետ հանդիպումից խուսափելը»,- գրել է Սիբիհան։
Ռուսաստանն ու Ուկրաինան պատրաստվում են անցկացնել առաջին ուղիղ բանակցությունները, քանի որ Մոսկվայի վրա ճնշում է գործադրվում՝ համաձայնվելու 30-օրյա հրադադարի։
Սպասվում է, որ Վլադիմիր Զելենսկին մայիսի 15-ին կմեկնի Թուրքիա։ Նա ՌԴ նախագահ Վլադիմիր Պուտինին ավելի վաղ հրավիրել էր Ստամբուլում բանակցությունների։ Կրեմլը, սակայն, չի հայտնում՝ Պուտինը մասնակցելո՞ւ է բանակցություններին, թե՞ ոչ։Միջազգային լրատվամիջոցներում տեղեկություններ են տարածվում, որ Ստամբուլում ուկրաինական կողմի հետ հնարավոր բանակցություններին Պուտինը չի մեկնելու, ռուսական պատվիրակությունը գլխավորելու է ՌԴ ԱԳ նախարար Սերգեյ Լավրովը։ Սպասվում է, որ պատվիրակության կազմում լինելու է նաև ՌԴ նախագահի օգնական Յուրի Ուշակովը։
Թարգմանությունը՝ Էմմա Չոբանյանի
