Մակրոնը հայտարարել է, որ Ֆրանսիան չի ցանկանում «Երրորդ համաշխարհային պատերազմ» Ուկրաինայի պատճառով

Ֆրանսիայի նախագահ Էմանուել Մակրոնը հայտարարել է, որ Փարիզը չի ցանկանում «Երրորդ համաշխարհային պատերազմ» սկսել Ռուսաստանի կողմից Ուկրաինա ներխուժման պատճառով և խոստացել է հանրաքվեներ անցկացնել հիմնական հարցերի շուրջ՝ հեռուստատեսային ելույթում ներկայացնելով իր նպատակները նախագահի լիազորությունների ժամկետի առաջիկա երկու տարիների համար։

Մակրոնը, որն իշխանության է եկել 2017 թվականին՝ խոստանալով արմատական ​​փոփոխություններ, կհեռանա պաշտոնից 2027 թվականին՝ Սահմանադրությամբ թույլատրված առավելագույն երկու ժամկետով պաշտոնավարելուց հետո, գրում է France 24-ը։

Ըստ հրապարակման՝ անցած տարվա ընթացքում Մակրոնը երբեմն անհաջողության է մատնվել, հատկապես այն բանից հետո, երբ արտահերթ խորհրդարանական ընտրություններ անցկացնելու նրա որոշումը հակառակ արդյունք տվեց՝ ծայրահեղ աջ կուսակցությունը դարձնելով խորհրդարանում ամենամեծը, իսկ իր սեփական կուսակցությունը՝ փոքրամասնություն։

Սակայն Մակրոնը վերջին ամիսներին վերականգնել է իր թափը, որին նպաստել է միջազգային ասպարեզում նրա ներկայությունը, քանի որ նա ձգտում է վերջ դնել Ռուսաստանի կողմից Ուկրաինա ներխուժման հետևանքով սկսված երեք տարվա պատերազմին։

«Մենք պետք է օգնենք Ուկրաինային պաշտպանվել, բայց մենք չենք ուզում սկսել Երրորդ համաշխարհային պատերազմ»,- ասել է Մակրոնը երեք ժամից ավելի տևած հարցազրույցում։

«Պատերազմը պետք է դադարեցվի, և Ուկրաինան պետք է լինի բանակցությունների համար լավագույն հնարավոր իրավիճակում։ Նույնիսկ ուկրաինացիներն ունեն այն հեռատեսությունը, որ ասեն՝ իրենք չունեն 2014 թվականից ի վեր գրավված ամեն ինչ վերադարձնելու կարողություն»,- հավելել է նա՝ նկատի ունենալով Ղրիմի թերակղզու՝ Ռուսաստանի կողմից բռնակցումը։

Մակրոնը նաև հայտարարել է, որ Ֆրանսիան պատրաստ է սկսել քննարկումներ այլ եվրոպական երկրների հետ՝ իրենց տարածքում միջուկային զենքով զինված ֆրանսիական ռազմական ինքնաթիռներ տեղակայելու վերաբերյալ, ինչպես դա անում է Միացյալ Նահանգները։

«Ամերիկացիները ռումբեր ունեն Բելգիայի, Գերմանիայի, Իտալիայի, Թուրքիայի ինքնաթիռներում։ Մենք պատրաստ ենք սկսել այս քննարկումը։ Ես շրջանակը շատ կոնկրետ ձևով կսահմանեմ առաջիկա շաբաթների և ամիսների ընթացքում»,- նշել է նա։

Բացի այդ, Մակրոնըն հայտարարել է, որ կողմ է նույն օրը մի քանի հանրաքվե անցկացնելուն, որպեսզի ընտրողները որոշում կայացնեն Ֆրանսիայի սոցիալական և տնտեսական «բարեփոխումների» վերաբերյալ։

«Ես ուզում եմ, որ մենք կազմակերպենք մի շարք խորհրդակցություններ»,- նշել  է նա՝ հավելելով, որ քվեարկությունները տեղի կունենան առաջիկա ամիսներին մեկ օրվա ընթացքում և կանդրադառնան «խոշոր» տնտեսական և սոցիալական բարեփոխումներին։ Հանրաքվեները կարող են նաև անդրադառնալ սոցիալական բարեփոխումներին, ինչպիսիք են 15 տարեկանից փոքր անձանց համար սոցիալական ցանցերին հասանելիությունը և օժանդակ մահացությունը։

Այնուամենայնիվ, Մակրոնը մերժել է ներգաղթի հարցերը համաժողովրդական քվեարկության դնելու գաղափարը՝ չնայած աջերի և ծայրահեղ աջերի բազմաթիվ կոչերին։

Լրատվամիջոցն ընդգծում է, որ մինչ Մակրոնը պետք է հեռանա 2027 թվականին՝ երկու անընդմեջ ժամկետից հետո, տեսականորեն նա կարող է վերադառնալ 2032 թվականին, ինչը նախկինում ոչ մի ֆրանսիացի առաջնորդ չի արել։

Հեռուստամարաթոնի ավարտին նա ասել է, որ դեռևս չի մտածել 2027 թվականից հետո իր քաղաքական ապագայի մասին, և որ ամենօրյա աշխատանքում մտածում է միայն Ֆրանսիայի մասին։

«Երբ ավարտեմ [ներկայիս ժամկետը], կմտածեմ հաջորդի մասին։ Այդ ժամանակ կկարողանամ պատասխանել ձեզ։ Բայց այսօր ես դրա մասին չեմ մտածում»,- հայտարարել է Մակրոնը։

Թարգմանությունը՝ Էմմա Չոբանյանի