Փաստաբանների ընդհանուր ժողովը՝ Պալատի խորհրդի անդամների ընտրության օրակարգով․ ՈՒՂԻՂ

Փաստաբաններն այսօր գործադուլ և ընդհանուր ժողով են անում։  Գործադուլավորների պահանջը հարկային օրենսգրքում կատարված և հունվարի 1-ից ուժի մեջ մտած փոփոխությունները չեղարկելն է։

Այս փոփոխությունների համաձայն՝ փաստաբանական ծառայություններ մատուցող՝ շրջանառության հարկ վճարողներին պարտադրվում է անցնել հարկման ընդհանուր համակարգ (վճարել ԱԱՀ և շահութահարկ), ինչպես նաև փաստաբանական գրասենյակների կողմից անվճար հիմունքներով մատուցվող ծառայությունները ենթարկվում են հարկման ավելացված արժեքի հարկով:

Փաստաբանական ծառայություններ մատուցող կազմակերպությունների և անհատ ձեռնարկատերների կողմից վճարման ենթակա հարկը փաստացի բարձրացել է 6-8  անգամ (5 տոկոս շրջանառության հարկի փոխարեն հարկվում են ավելացված արժեքի հարկով (ԱԱՀ) (դրույքաչափը՝ 20 տոկոս) և շահութահարկով (դրույքաչափը՝ 18-23 տոկոս)։

Օրենքի կիրառման արդյունքում, ըստ փաստաբանների,  Հայաստանի Հանրապետության իրավաբանական օգնության համակարգը, որի առանցքային դերակատարներից է փաստաբանական ինստիտուտը, ենթարկվում է ոչ իրավաչափ և չհիմնավորված ճնշման:

Մասնավորապես Օրենքի կիրառությունը՝

–   Էական բացասական ազդեցություն է ունենում անձանց խախտված իրավունքների պաշտպանության վրա,

–   բացառում է անվճար իրավաբանական օգնության տրամադրման (pro bono) հնարավորությունը փաստաբանական կազմակերպությունների կողմից.

–   շեշտակի ավելացնում է փաստաբանական ծառայությունների ինքնարժեքը՝ սահմանափակելով իրավաբանական օգնության հասանելիությունը, մատչելիությունը և դատական պաշտպանության իրացման հնարավորությունը.

–   չկանխատեսված էական ֆինանսական բեռ է առաջացնում անհատ փաստաբանների և փաստաբանական կազմակերպությունների համար, որոնք պետք է շարունակեն իրավաբանական օգնություն տրամադրել արդեն իսկ կնքված պայմանագրերի շրջանակներում.

–   հանգեցնում է խտրական պայմանների ֆիզիկական անձ քաղաքացիների համար քանի որ ի տարբերություն ԱԱՀ վճարող առևտրային կազմակերպությունների քաղաքացիներին մատուցվող փաստաբանական ծառայությունները արժեքը քսան տոկոսով բարձր է.

–   լրացուցիչ ծանրաբեռնում է փաստաբանների աշխատանքը, ինչպես նաև լրացուցիչ ծախսերի առիթ է դառնում՝ հաշվապահական ծառայություններից օգտվելու պարտադիր անհրաժեշտություն ստեղծելով.

–   սահմանափակում է փաստաբանական ինստիտուտի զարգացման հնարավորությունը ակնհայտ դժվարացնելով նորաստեղծ փաստաբանական գրասենյակների կազմավորումը պայմանավորված ծանր հարկային բեռով,

–   խտրական պայմաններ է ստեղծում փաստաբանական գործունեություն իրականացնողների համար ի տարբերություն տնտեսության այլ բնագավառների, որտեղ կիրառվում են հարկային արտոնյալ պայմաններ:

Ընդհանուր ժողովի օրակարգում նաև փաստաբանների պալատի խորհրդի անդամների ընտրությունն է։ Որպես խորհրդի անդամի  թեկնածուներ առաջադրվել են փաստաբաններ Վարազդատ Հարությունյանը, Դավիթ Վարդիկյանը, Ռուբեն Հակոբյանը, Դավիթ Մելքոնյանը, Էմին Բեգլարյանը,Պավել Գյուլումյանը, Մարինե Ֆարմանյանը, Թամարա Բաղդասարյանը,  Արսեն Հարությունյանը, Լիլիթ Ղազանչյանը,Ռոման Ահարոնյանը, Ցոլակ Մարգարյանը, Կարեն Աղաջանյանը, Աշոտ Սիմոնյանը։ Յուրաքանչյուր փաստաբան կարող է ընտրել միաժամանակ 6 թեկնածուի։

Տեղի կունենա նաև ասուլիս՝ հարկային օրենսգրքում տեղի ունեցած փոփոխությունների հարուցած խնդիրների թեմայով, ընդհանուր ժողովը նաև հայտարարություն է ընդունելու՝ կապված այս փոփոխությունների հետ։

Արաքս Մամուլյան