13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Հայաստանը կդառնա Մշտական արբիտրաժային դատարանի անդամ
Հասարակություն
10.01.2025 | 15:25
Հաագայի կոնվենցիաների վավերացմամբ Հայաստան կանդամակցի Մշտական արբիտրաժային դատարանին:
«Արմենպրես»-ի փոխանցմամբ՝«1899 թվականի հուլիսի 29-ին եւ 1907 թվականի հոկտեմբերի 18-ին Հաագայում ընդունված «Միջազգային վեճերի խաղաղ կարգավորման մասին» կոնվենցիաները վավերացնելու մասին օրենքի նախագիծն ԱԺ պետաիրավական հարցերի հանձնաժողովում ներկայացրեց Միջազգային իրավական հարցերով ներկայացուցիչ Եղիշե Կիրակոսյանը:
Կիրակոսյանը նշեց՝ երկու կոնվենցիաները սիմվոլիկ նշանակություն ունեն: Առաջին անգամ միջազգային իրավունքի պատմության մեջ իրավական առումով ձևակերպվեց վեճերի խաղաղ կարգավորման սկզբունքի բովանդակությունը և պետությունների համար հանձնառություն ստեղծվեց՝ վեճերի կարգավորումն իրականացնել բացառապես խաղաղ միջոցներով:
«Կոնվենցիաների վավերացմամբ Հայաստանը նաև դառնում է Մշտական արբիտրաժային դատարանի անդամ պետություն և դրանով իսկ հնարավորություն է ստանում ներկայացնել արբիտրների թեկնածուներ, որոնք որպես արբիտրներ կարող են հանդես գալ պետությունների միջև վեճերի կամ ներդրումային արբիտրաժների դեպքում գործերի քննության ժամանակ»,–ասաց Կիրակոսյանը:
Այս պահի դրությամբ Մշտական արբիտրաժային դատարանին անդամակցում են 124 երկիր: Եթե Հայաստանը վավերացնի, կդառնա 125-րդ երկիրը:
Ըստ Կիրակոսյանի՝ կոնվենցիաների վավերացմամբ Հայաստանը արտաքին քաղաքական առումով կարևոր ուղերձ է ուղարկում՝ վեճերի խաղաղ կարգավորման, խաղաղության հաստատման, նաև ուժի կիրառման ու ուժի կիրառման սպառնալիքի արգելքի մասին:
ՀՀ մասնակցությամբ Մշտական արբիտրաժային դատարանում այս պահին ընթանում են մի քանի գործերի քննություններ: Ըստ Կիրակոսյանի՝ դա ևս լրացուցիչ խթան է հանդիսանում Հայաստանի համար՝ մասնակից դառնալու այդ ինստիտուտին:
Հանձնաժողովը հավանություն տվեց կոնվենցիաների վավերացմանը: Վավերացման մասին նախագիծը կքննարկվի ԱԺ լիագումար նիստում:
