«Նաղդ շահույթի»արշավանքը խժռում է Երևանը, «քյարը» ստանան, հետո պետք լինի`կփախչեն. Գևորգ Տեր-Գաբրիելյան. ՏԵՍԱՆՅՈՒԹ

«Ռուսաստանը Հայաստանին և ԽՄ այլ պետությունների պարտադրում է, որ մայիսի 9-ը դառնա ոչ թե պատերազմի, հուշի, այլ Ռուսաստանին, Մոսկվային հավատարիմ լինելու օր, այդպիսի երանգ է հաղորդում տոնին»,- Factor TV-ի հետ զրույցում տեսակետ է հայտնում արձակագիր, գրականագետ Գևորգ Տեր-Գաբրիելյանը` անդրադառնալով մայիսի 9-ի համատեքստում այն վերարժևորումներին և վերագնահատումներին, որ մեր ժողովուրդը պետք է անի:

Նա հիշեցնում է` հունիսի 14-ը բռնադատվածների հիշատակի օրն է, բայց այն երբեք չի եղել մեր որևէ իշխանության ուշադրության կենտրոնում. «Այս օրն առհասարակ որևէ կերպ չի նշանավորվում, մի քանի հոգի են հավաքվում, իսկ իշխանությունից ներկայացուցիչ երբեք չի գալիս, այս օրը չի ակտուալանում, չի քաղաքականացվում»:

Մեր զրուցակիցն անդրադառնում է նաև երևանյան մի շարք խնդիրների, այդ թվում`օդի աղտոտվածությանը, կանաչ տարածքների զավթմանը. «Վայրի կապիտալիզմը եկավ Երևան: Կենտրոնում ներդրում անելն ամենաձեռնտուն է, հինը ոչնչացնում են, որ փող գա, քաղաքից դուրս շենքեր չեն կառուցում, որովհետև շահավետ չէ: Ներդրողը և քաղաքային իշխանությունը`երեկվա և այսօրվա, ուզում են նաղդ, քյաշ շահույթ ստանան, որքան կարելի` շուտ, այդքան կարճատես են: Գիտեն, որ պետությունը վտանգված է, վաղը մյուս օրը կարող է մի բան պատահի, մտածում են`եկեք ներդրում չանենք մի տեղ, որտեղ շահույթ բերելը ժամանակ կտանի, փոխարենը «քյարը» արագ ստանանք, հետո պետք լինի`կփախչենք»:

Արձակագրի խոսքով` «կարճատես նաղդի արշավանքը» եկել է խժռելու Երևանը. «Հույս ունեինք, որ նոր կառավարությունը այդպես չէր անի, բայց ոչ, փող է պետք»:

Մանրամասները` տեսանյութում:

Աննա Բաբաջանյան