23.04.2026 | 17:51
ՌԴ-ն եվրոպական երկրներին մեղադրել է, իբր, «Կալինինգրադի գրավմանը նախապատրաստվելու մեջ»
Թուրքմենստանից Հայաստան գազ ներմուծելու հարցի շուրջ Երևանն ու Աշգաբադը դեռ նախնական համաձայնության չեն եկել․ ՏԿԵՆ
Տնտեսություն
10.05.2025 | 18:07
«ՀՀ պատկան մարմինները տարիներ ի վեր տարբեր ձևաչափերով քննարկումներ են ունեցել թուրքմենական կողմի հետ Թուրքմենստանից Հայաստան գազ ներմուծելու հարցի շուրջ։ Սակայն, կողմերը դեռևս չեն եկել նախնական համաձայնության, որոնց արդյունքներով հնարավոր լինի բանակցություններ սկսել»,- այս մասին Factor TV-ի գրավոր հարցմանն ի պատասխան տեղեկացրել են Տարածքային կառավարման և ենթակառուցվածքների նախարարությունից։
Գերատեսչությունից միաժամանակ նշել են, որ հարցի շուրջ տարբեր ժամանակներում քննարկումներ են եղել իրանական կողմի հետ, որոնց շրջանակներում իրանական կողմը դրական է արտահայտվել և պատրաստակամություն հայտնել կողմերի միջև նախնական պայմանավորվածություն լինելու դեպքում քննարկել տարանցման հետ կապված մանրամասները։
Հիշեցնենք, որ Նիկոլ Փաշինյանի խորհրդական Արտաշես Թումանյանը մարտի 26-ին Երևանում անցկացված Հայաստանի և Թուրքմենստանի միջև տնտեսական համագործակցության միջկառավարական հանձնաժողովի 10-րդ նիստի ընթացքում հայտարարել էր, որ Երևանն ու Աշգաբադը բանակցություններ են վարում «Թուրքմենգազ» պետական կոնցեռնից բնական գազի գնման գործարքի շուրջ, որի միջոցով հնարավոր կլինի թուրքմենական գազն Իրանի տարածքով հասցնել Հայաստան։
Փաշինյանի խորհրդականը նաև ասել էր, որ վերջին մի քանի տարիների ընթացքում հայաստանյան պատվիրակությունները այցելություններ են ունեցել Թուրքմենստան, որոնց ընթացքում քննարկվել են մի շարք ծրագրեր, որոնք վերաբերում են նաև էներգետիկայի ոլորտին։
Մանյա Պողոսյան
