28.06.2026 | 03:11
ԱԱ-2026. Անգլիան ու Խորվաթիան հաղթեցին և կխաղան փլեյ-օֆֆում. ՏԵՍԱՆՅՈՒԹ
Երևան-Ապարան ճանապարհին «GAZel»-ի վթարի հետևանքով տուժածների կյանքին վտանգ չի սպառնում
06.01.2025 | 18:44
Երևան-Ապարան երթուղին սպասարկող 531 համարի «GAZel» մակնիշի ավտոմեքենայի վթարի հետևանքով, ընդհանուր առմամբ, ծանր կամ ծայրահեղ ծանր, կյանքին վտանգ սպառնացող դեպքեր չկան, տուժածներից շատերն արդեն դուրս են գրվել հիվանդանոցից: «Արմենպրես»-ի հետ զրույցում այս մասին հայտնել է Հայաստանի Հանրապետության առողջապահության նախարարության մամուլի խոսնակ Մարիամ Ծատրյանը: Նա նշել է, որ վթարի հետևանքով Ապարանի ԲԿ է դիմել 7 տուժած, որից 2-ը երեխաներ են։ Վերջիններս տեղում համապատասխան առաջին բուժօգնություն են ստացել և դուրս են գրվել։
Մնացած տուժածները մեծահասակներ են, որոնցից 2 դուրս է գրվել, 3-ը դեռևս հոսպիտալացվել են, բայց առաջիկա ժամերին դուրս կգրվեն։ 1 տուժած անձ դիմել է Աշտարակի ԲԿ, ստանում է համապատասխան բուժոգնություն և նա էլ առաջիկայում դուրս կգրվի։
Ավելի վաղ ՀՀ ներքին գործերի նախարարությունը հաղորդել էր, որ Արագածոտնի մարզային փրկարարական վարչության ճգնաժամային կառավարման կենտրոն հունվարի 6-ին, ժամը 13:52-ին ահազանգ է ստացվել, որ Արտաշավան գյուղի Տառերի Պուրակ հուշարձանի մոտակայքում տեղի է ունեցել ավտովթար։Գերատեսչությունից նշել էին, որ դեպքի վայր է մեկնել մարզային փրկարարական վարչության օպերատիվ խումբը և հրշեջ-փրկարարական ջոկատից մեկ մարտական հաշվարկ:
«Ըստ նախնական տվյալների՝ Երևան-Ապարան երթուղին սպասարկող 531 համարի «GAZel» մակնիշի ավտոմեքենան դուրս է եկել ճանապարհի երթևեկելի հատվածից և հայտնվել ձորակում․ կան տուժածներ»,- հայտնել էր ՆԳՆ-ը։
