08.10.2026 | 15:25
Գրականության ոլորտում Նոբելյան մրցանակը շնորհվել է կանադացի հեղինակի
Կառավարությունը հավանություն տվեց «Արհեստական բանականության, մարդու իրավունքների, ժողովրդավարության և օրենքի գերակայության մասին» ԵԽ-ի շրջանակային կոնվենցիայի ստորագրմանը
Քաղաքականություն
27.12.2024 | 12:12
Գործադիրը չզեկուցվող հարցով հավանություն տվեց «Արհեստական բանականության, մարդու իրավունքների, ժողովրդավարության և օրենքի գերակայության մասին» Եվրոպայի խորհրդի շրջանակային կոնվենցիայի ստորագրմանը:
Նշենք, որ «Արհեստական բանականության և մարդու իրավունքների, ժողովրդավարության և օրենքի գերակայության մասին» Եվրոպայի խորհրդի շրջանակային կոնվենցիան հաստատվել է այս տարվա մայիսի 17-ին ԵԽ 133-րդ նախարարական համաժողովի որոշումներով: Այն բաց է ստորագրման ոչ միայն ԵԽ անդամ, այլ նաև ոչ անդամ երկրների համար: Կոնվենցիան ստորագրման է բացվել 2024թ. սեպտեմբերի 5-ին Վիլյնյուսում տեղի ունեցած ԵԽ անդամ երկրների արդարադատության նախարարների ոչ պաշտոնական համաժողովի շրջանակներում:
Ըստ կառավարության հիմնավորման՝ կոնվենցիայի բացման օրը և առ այսօր այն ստորագրել են Միացյալ Թագավորությունը, Նորվեգիան, Իսլանդիան, Մոլդովան, Վրաստանը, Անդորրան, Սան Մարինոն, ԵԽ դիտորդ երկրներից՝ ԱՄՆ-ը, ԵԽ ոչ անդամ երկրներից՝ Իսրայելը: Կոնվենցիան ԵՄ-ը ստորագրել է ԵՄ անդամ երկրների անունից: Կոնվենցիան ուժի մեջ կմտնի 5 պետության կողմից ստորագրման, ներառյալ՝ ԵԽ անդամ երեք երկրի վավերացման դեպքում:
Կոնվենցիան միջազգային առաջին իրավական փաստաթուղթն է, որը նպատակ է հետապնդում ապահովելու մարդու հիմնարար իրավունքների պաշտպանությունն արհեստական բանականության կիրառման ոլորտում: Մասնավորապես, Կոնվենցիան կոչված է բացառել թվայնացման գործընթացներում կենսաբանական տվյալները նույնականացնելիս անձի հանդեպ ռասսայով, կրոնով, սեռով պայմանավորված խտրականությունը, որի դեպքում նախատեսվում են համապատասխան տուգանքներ: Այն բաց է ստորագրման ոչ միայն ԵԽ անդամ, այլ նաև ոչ անդամ երկրների համար:
Արհեստական բանականության ոլորտը ողջ աշխարհում ապրում է աննախադեպ զարգացում և արդեն իսկ օգտագործվում է բազմաթիվ ոլորտներում:
Միաժամանակ արհեստական բանականության համակարգերը, համապատասխան իրավական կարգավորումների և վերահսկողության բացակայության պարագայում, կարող են վտանգել մարդու իրավունքները, ժողովրդավարության և օրենքի գերակայության սկզբունքները:
Հիմնավորման մեջ նշվում է՝ հաշվի առնելով այն հանգամանքը, որ Հայաստանը դեռևս առկա չեն ոլորտային բավարար իրավական կարգավորումներ, Կոնվենցիայի ստորագրումը հնարավորություն կտա զարգացնելու արհեստական բանականության կիրառման ոլորտին առնչվող իրավական դաշտը՝ միջազգային գործընկերների հետ սերտ համագործակցության միջոցով:
