30.04.2026 | 10:10
Դրամն արժևորվել է․ արտարժույթների փոխարժեքները՝ ապրիլի 30-ի դրությամբ
«Օպել»-ի վարորդների պատասխանը Ավինյանի հորը. Փաշինյանը sms կուղարկի՞ քաղաքապետին. ՏԵՍԱՆՅՈՒԹ
Քաղաքականություն
27.12.2024 | 21:45
«Օպել»-ների վարորդները զայրացած են Երևանի քաղաքապետ Տիգրան Ավինյանի հոր՝ Արմեն Ավինյանի` իրենց ուղղված վիրավորական արտահայտություններից։ «Ասեք, կանենք» կարգախոսով քաղաքապետ դարձած Ավինյանի հայրը կոպիտ բառապաշարով երեկ թիրախավորել էր «Օպել»-ի վարորդներին։
Վարորդները տարակուսած են՝ ինչպե՞ս կարելի է վիրավորել համեմատաբար էժան մեքենայով, բայց արդար ճանապարհով իրենց օրվա ապրուստը վաստակողներին։
Տիգրան Ավինյանը հոր մասնակցությամբ տեսանյութի հրապարակմանն արագ արձագանքեց՝ Տելեգրամում ներողություն հայցելով։ Չնայած դրան՝ քաղաքապետ Ավինյանն արդարացում ունի, թե ինչու է Ավինյան ավագը թիրախավորել «Օպել»-ի վարորդներին։
Իրավապաշտպան Նինա Կարապետյանցը գովելի է համարում Ավինյանի ափսոսանքի խոսքերը, սակայն շեշտում է՝ եթե իր հայեցողությանը մնար, ոչ էլ կխնդրեր։
Քաղաքացիների արժանապատվությունը վիրավորելու հարցում Արմեն Ավինյանը միակը չէ։ Քաղաքապետի հոր հետ կարող է մրցել, օրինակ, ԱԺ նախագահի մայրը։ Ալեն Սիմոնյանի մայրը 2022 թվականին միջնամատ էր ցույց տվել և թքել քաղաքացիների ուղղությամբ։ Այս դեպքից մեկ տարի անց արդեն քաղաքացու վրա թքեց անձամբ Ալեն Սիմոնյանը։ Իշխանության երկրորդ դեմքը չէր հանդուրժել իրեն տրված «դավաճան» որակումը։
Նիկոլ Փաշինյանը նույնպես իր խոսույթով հետ չի մնում թիմակիցներից ու նրանց հարազատներից։ Այսօր արդեն Նիկոլ Փաշինյանը ծավալուն գրառում էր արել էթիկայի պահպանման կարևորության մասին։
Ինչ խոսք, լավ է, որ ասֆալտին փռելու, պատերին ծեփելու, թաթիկները կտրելու, բորդյուր լիզելու, շինելու և այլ խնդրահարույց արտահայտությունների հեղինակ Փաշինյանը մտահոգություն է հայտնում էթիկայի նորմերի չպահպանման վտանգների մասին։ Մնում է միայն սպասել և տեսնել՝ արդյո՞ք այս մտահոգությունը կվերաճի քաղաքապետին ուղղված sms-ով խնդրանքի, թե՞ սա էլ կանցնի-կգնա։
Մանրամասները՝ տեսանյութում։
Նարեկ Կիրակոսյան
