Հասարակություն
20.12.2024 | 17:21
Համացանցում տեսանյութ է տարածվել, որում ենթադրաբար ուսուցիչը մտնում է դասասենյակ և հարվածում պահարանին, դրա միջից դուրս է գալիս աշակերտներից մեկը։ Տղամարդը վերցնում է աշակերտի մոտ գնվող հյութի տարան և հարվածում նրա գլխին։ Նույն տեսանյութում նաև երևում է, որ ուսուցիչը հարվածում է մեկ այլ աշակերտի և նրան դուրս հանում դասասենյակից։
Տաշիր քաղաքի Արտակ Խաչատրյանի անվան դպրոցի տնօրենի պաշտոնակատար Ռոզա Դավթյանը Factor.am-ի հետ զրույցում տեղեկացրեց, որ տեսանյութը նոր է տեսել և գործընթաց է սկսել միջադեպի հետ կապված՝ պարզելու, թե ինչ է տեղի ունեցել դասասենյակում։ Նա հայտնեց, որ միջադեպը տեղի է ունեցել 10-րդԱ դասարանի աշակերտների և մաթեմատիկայի ուսուցչի միջև։
«Ներկայիս տվյալներով՝ ուսուցիչը մտել է դասասենյակ, և երեխան եղել է պահարանի մեջ։ Երեխաներից մի քանի հոգի այստեղ են, ասում են՝ ոչ թե ուսուցիչն է մտցրել երեխային պահարանի մեջ, այլ զանգը տվել է, ուսուցիչը մտել է դասարան և տեսել, որ աշակերտը պահարանում է, դասը դեռ սկսված չի եղել։ Այս պահին ոչինչ հստակ չեմ կարող ասել, որովհետև նոր եմ սկսել գործընթացը, լավ կլինի ուսումնասիրեմ, պարզեմ եղելությունը և նոր պատասխանեմ»,- մանրամասնեց տնօրենի պաշտոնակատարը։
Դիտարկմանը, որ ըստ տեսանյութի, ուսուցիչը հարվածում է ևս մեկ աշակերտի, Ռոզա Դավթյանն ասաց, որ այդ մասով բացատրություն է պահանջել մաթեմատիկայի ուսուցչից։
«Խոսել եմ ուսուցչի հետ, ասել է, որ փաստաբանով կներկայանա։ Երեխաներին եմ կանչել ծնողների հետ։ Իրողությունը կպարզենք, ընթացք կտրվի ըստ օրենքի»,- փոխանցեց նա։
Մանյա Պողոսյան
