Թանկն ավելի՞ էժան է․ ԱԺ-ի կասկածելի գնումը

Ազգային Ժողովը նոյեմբերի 20-ին 5 մլն 469 հազար դրամ արժեքով պայմանագիր է կնքել «ՄԱՅՆ ՇԻՆ» ՍՊ ընկերության հետ՝ պատվիրելով խորհրդարանի երկրորդ մասնաշենքի 110 սրահի ընթացիկ նորոգումը։ Խնդիրն այն է, որ այս ընկերությունը ստեղծվել է ընդամենը ամիսներ առաջ՝ 2024 թ-ի օգոստոսի 19-ին։ Հիմնադիրը Միսակ Նալբանդյանն է։ Պետական ռեգիստրի համաձայն՝ որևէ այլ ընկերությունում նա մասնակցություն չունի։ Ընկերության և դրա սեփականատիրոջ մասին համացանցում այլ տեղեկություններ գտնել չհաջողվեց։

Ազգային Ժողովի մրցույթը հայտարարել է «ՄԱՅՆ ՇԻՆ»-ի հիմնադրումից 2 ամիս անց՝ հոկտեմբերի 16-ին։ Գնային առաջարկի առավելագույն շեմ սահմանվել է 6,973,648 ՀՀ դրամ։ Մրցույթն անցկացվել է «գնանշման հարցում» ընթացակարգով։ Մասնակցել է 5 ընկերություն։ Ընդ որում՝ «ՄԱՅՆ ՇԻՆ»-ն ամենացածր գին առաջարկողը չէ։

Դրանից 69 հազար դրամով պակաս մրցութային գին է առաջարկել «Արտշին պլյուս» ՍՊԸ-ն։ Վերջինիս փաստաթղթերում մրցութային գնահատման հանձնաժողովը որևէ խախտում չի գտել, սակայն որոշել է, որ «հրավերի պահանջների նկատմամբ բավարար գնահատված և նվազագույն գնային առաջարկ ներկայացրած մասնակից «Մայն Շին» ՍՊԸ-ին հայտարարել որպես ընտրված մասնակից»։

«Մայն Շին»-ն Ազգային ժողովում արդեն սկսել է աշխատանքները։

Թե ինչու է մերժվել 5․4 մլն դրամանոց առաջարկը, հանձնաժողովի արձանագրություններում այս մասին որևէ խոսք չկա։ Ստացվում է, ըստ գնահատման հանձնաժողովի, 5,469,000 ՀՀ դրամն ավելի փոքր գին է, քան 5,400,000 ՀՀ դրամը։
Ի դեպ, ի տարբերություն «ՄԱՅՆ ՇԻՆ» ՍՊԸ-ի, որը նախկինում նման փորձառություն չունի, «Արտշին պլյուս» ՍՊԸ-ն 2023 թ-ի օգոստոսին ԱԺ-ի հետ մեկ այլ պայմանագիր ունի՝ միանգամից 3 դահլիճների ընթացիկ նորոգում։ Այդ ժամանակ 1 դահլիճի նորոգման միջին գինը մոտ 4․5 մլն դրամ է կազմել։ Նկատենք, որ «Արտշին պլյուս» ՍՊԸ-ի սեփականատերը Արտակ Ալեքսանյանն է, որն, ըստ մամուլում տարածված տեղեկությունների, Էկոպարեկային ծառայության պետ, ՔՊ-ական Վլադիմիր Կիրակոսյանի ընկերն է։
Այս դեպքում հարց է ծագում՝ արդյո՞ք շարքային գործարար է «ՄԱՅՆ ՇԻՆ» ՍՊԸ-ի սեփականատեր Միսակ Նալբանդյանը։

Գայանե Խաչատրյան