16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Կոպիրկինը հայտարարել է, թե «ՌԴ-ն հավատարիմ է Հայաստանի անվտանգության ապահովման պարտավորություններին և՛ երկկողմ, և՛ ՀԱՊԿ-ի ձևաչափով»
Քաղաքականություն
25.11.2024 | 11:18
«Ռուսաստանը ակնկալում է Եվրասիայում հավասար և անբաժանելի անվտանգության համակարգի մշակման համատեղ ջանքերում Հայաստանի մասնակցությունը»․ այս մասին «Իզվեստիա»-ի հետ հարցազրույցում ասել է Հայաստանում ՌԴ դեսպան Սերգեյ Կոպիրկինը։
«Խոսելով Հայաստանի անվտանգության ապահովման խնդիրների մասին՝ մենք հավատարիմ ենք այն դիրքորոշմանը, որ ռուս-հայկական դաշնակցային համագործակցությանը համեմատելի իրական այլընտրանքներ չկան, այդ թվում՝ ՀԱՊԿ-ի շրջանակներում։ Ռուսաստանը հավատարիմ է մնում իր պարտավորություններին` ապահովելու Հայաստանի անվտանգությունը ինչպես երկկողմ ձևաչափով, այնպես էլ ՀԱՊԿ-ի միջոցով»,-ասել է ՌԴ դեսպանը՝ անդրադառնալով հարցին, թե արդյոք Հայաստանը մասնակցելո՞ւ է նոյեմբերի 28-ին ՀԱՊԿ Հավաքական անվտանգության խորհրդի նիստին և որո՞նք են ՀԱՊԿ-ում ՀՀ լիարժեք գործունեության վերսկսման հեռանկարները։
Նա նաև նշել է, որ Մոսկվան ակնկալում է «հայ գործընկերների ակտիվ ներգրավվածությունը» Եվրասիական մայրցամաքում հավասար և անբաժանելի անվտանգության համակարգի մշակման համատեղ ջանքերում, որի գաղափարն առաջ է քաշել ՌԴ նախագահ Վլադիմիր Պուտինն այս տարվա հունիսի 14-ին կայացած հանդիպման ժամանակ ՌԴ ԱԳՆ ղեկավարության հետ և կրկին բարձրաձայնել վերջերս Կազանում կայացած ԲՐԻԿՍ-ի գագաթնաժողովի ժամանակ:
Ըստ Կոպիրկինի՝ շատ քիչ ժամանակ է անցել Կազանում կայացած գագաթնաժողովից հետո ԲՐԻԿՍ-ի գործունեության հետ կապված պաշտոնական Երևանի դիրքորոշման նոր ասպեկտները վերլուծելու համար։
«Մենք հասկանում ենք, որ մեր հայ ընկերներին ժամանակ է պետք միջպետական այս ակումբի գործունեությանը մոտիկից ծանոթանալու համար։ Օբյեկտիվորեն, ԲՐԻԿՍ-ի ընտանիքում Հայաստանի կարևորագույն գործընկերների՝ Ռուսաստանից բացի, Իրանի, Հնդկաստանի, Չինաստանի և ԱՄԷ-ի ներկայությունը, անկասկած, մեծացնում է այս հարթակի գրավչությունը Երևանի համար։ Դրան միանալու իրենց մտադրությունը հայտնել են նաև Ադրբեջանն ու Թուրքիան։ Սա թույլ է տալիս ասել, որ ողջ Հարավային Կովկասը զգում է ԲՐԻԿՍ-ի ձգողականությունը»,-նշել է ռուս դիվանագետը։
Խոսելով Երևանի և Բաքվի միջև խաղաղության պայմանագրի բանակցությունների գործընթացի մասին՝ նա ասել է, որ ցանկացած խաղաղության պայմանագրի նախապատրաստումը տքնաջան և շատ պատասխանատու գործընթաց է։
«Իհարկե, Մոսկվան շահագրգռված է, որ որքան հնարավոր է շուտ Հայաստանի և Ադրբեջանի միջև տիրի կայուն խաղաղություն։ Միևնույն ժամանակ, կարևոր է, որ տարածաշրջանի համար ճակատագրական այս փաստաթուղթը հիմնված լինի բոլոր փոխադարձ մտահոգությունների արդարացի լուծման վրա՝ առանց կողմերից որևէ մեկի մոտ «դառը համի»»,-ասել է Կոպիրկինը՝ հավելելով, որ հստակ տեսնում են, թե Երևանի և Բաքվի միջև փոխընդունելի փոխզիջումների հասնելը բարդ և ժամանակատար գործընթաց է։
«Ռուսաստանը միշտ պատրաստ է մեր հայ և ադրբեջանցի գործընկերներին աջակցություն ցուցաբերել երկկողմ հարաբերությունների կարգավորման հարցում՝ հետևելով Ռուսաստանի, Հայաստանի և Ադրբեջանի ղեկավարների միջև 2020-2022 թվականների եռակողմ համաձայնագրերի ոգուն և տառին։ Նման օգնության ձևերն ու ծավալները պետք է ընտրեն իրենք՝ բանակցող կողմերը։ Այս առումով մենք ուրախ ենք, որ հոկտեմբերի 24-ին Կազանում կայացած ԲՐԻԿՍ-ի գագաթնաժողովում Հայաստանի և Ադրբեջանի միջև ամենաբարձր մակարդակով արդյունավետ շփումներ են տեղի ունեցել՝ հնարավորություն տալով օգտակար ազդակ հաղորդել հարաբերությունների կարգավորման երկխոսությանը»,- հայտարարել է ՌԴ դեսպանը։
Թարգմանությունը՝ Էմմա Չոբանյանի
