18.07.2026 | 16:19
Սպասվում է կարճատև անձրև և ամպրոպ
Ադրբեջանի ԱԳՆ-ն՝ ադրբեջանցի դիվանագետի կողմից Տիգրան Բալայանին ուղղված մահվան սպառնալիքների մասին
Քաղաքականություն
05.11.2024 | 16:38
Ադրբեջանի ԱԳՆ-ն հրաժարվել է Turan գործակալությանն ի պատասխան պարզաբանել Politico-ի հրապարակումը ԵՄ-ում Ադրբեջանի դեսպան Վագիֆ Սադիգովի կողմից ԵՄ-ում Հայաստանի դիվանագիտական առաքելության ղեկավար Տիգրան Բալայանին ուղղված սպառնալիքները։ Գերատեսչությունը միայն հաստատել է, որ Politico-ն իսկապես շփվել է Ադրբեջանի դեսպանի հետ, և որ նա ասել է, թե այն ամենը, ինչ պնդում է Բալայանը, իբր, կեղծիք է:
Ադրբեջանի ԱԳՆ մամուլի խոսնակ Այխան Հաջիզադեն Turan-ի հետ զրույցում վկայակոչել է 2024 թվականի նոյեմբերի 4-ի Politico-ի հրապարակումը, որում Սադիգովը խոսել է, իբր, «հայկական կողմի հերյուրանքների մասին»։
«Մենք լրացուցիչ բացատրություններ չունենք»,- ասել է Ադրբեջանի ԱԳՆ ներկայացուցիչը։
Հիշեցնենք՝ Politico-ն գրել էր, որ Հայաստանի դեսպանությունը պաշտոնական նամակ է ուղարկել Բրյուսելում գտնվող այլ դիվանագիտական ներկայացուցչություններ այն բանից հետո, երբ ՀՀ դեսպանը հայտնել է, որ սպանության սպառնալիքներ է ստացել իր ադրբեջանցի պաշտոնակցից։ Անցյալ շաբաթ դեսպանների շրջանում տարածված նամակում ասվում է, որ ՀՀ դեսպան Տիգրան Բալայանը «բանավոր հարձակման և ահաբեկման է ենթարկվել» Ադրբեջանի դեսպան Վագիֆ Սադիգովի կողմից, որը «բացահայտ սպառնալիքներ է հնչեցրել իր կյանքի նկատմամբ»։
ՀՀ ԱԳ փոխնախարար Պարույր Հովհաննիսյանն այսօր խորհրդարանում լրագրողների հետ ճեպազրույցում հաստատել է Ադրբեջանի դեսպանի կողմից սպառնալիքների մասին տեղեկությունը։
Թարգմանությունը՝ Էմմա Չոբանյանի
