ՔՊ-ն արդարադատության նախարարի պաշտոնում որոշել է առաջադրել Սրբուհի Գալյանի թեկնածությունը

Հոկտեմբերի 29-ին տեղի է ունեցել «Քաղաքացիական պայմանագիր» կուսակցության Վարչության նիստ, որը վարել է Վարչության նախագահ, ՀՀ վարչապետ Նիկոլ Փաշինյանը։ Այս մասին տեղեկացնում են կուսակցությունից։

Ըստ հաղորդագրության՝ վարչությունը որոշել է ՀՀ արդարադատության նախարարի պաշտոնում առաջադրել Սրբուհի Գալյանի թեկնածությունը։

Նշենք, որ Սրբուհի Գալյանը ՀՀ գլխավոր դատախազի տեղակալն է, համակարգում է ապօրինի ծագում ունեցող գույքի բռնագանձման ոլորտը։

Factor.am-ի տեղեկություններով՝ այսօր ՔՊ վարչության նիստում քննարկվել են նաև ՆԳՆ փոխնախարար Արփինե Սարգսյանի և վարչապետի աշխատակազմի ղեկավարի նախկին տեղակալ Լիանա Ղալթաղչյանի թեկնածությունները։

Հիշեցնենք, որ արդարադատության նախարար Գրիգոր Մինասյանը հոկտեմբերի 1-ին ազատման դիմում է ներկայացրել։ ՔՊ-ական պատգամավորները, որոնց թվում են Արփի Դավոյանը, Անդրանիկ Քոչարյանը, Լուսինե Բադալյանը մինչ այդ ստորագրահավաք էին սկսել Մինասյանին հեռացնելու հարցով։ Ստորագրահավաքին միացել էր ընդհանուր 27 պատգամավոր։ Պատգամավորների հիմնավորումն այն էր, որ քաղաքացիները բողոքում են արդարադատության ոլորտում առկա խնդիրներից։

Ի դեպ, նշենք, որ ՔՊ վարչության անդամ Արփի Դավոյանը հայտարարել էր, որ նախարարը, իր կարծիքով, պետք է լինի կուսակցական։ Սակայն այս մեկ ամսվա ընթացքում ՔՊ-ն դիտարկեց որոշ կուսակցականների տարբերակները, բայց ի վերջո, կանգ առավ անկուսակցական թեկնածուի վրա։ Արդյո՞ք այս փաստը խոսում է այն մասին, որ Փաշինյանի կուսակիցների շարքում համապատասխան թեկնածու չի եղել։