22.06.2026 | 16:24
ՍԴ-ն փաստաթղթեր է պահանջել մի շարք պետական մարմիններից․ ՔՊ-ն որպես 3-րդ անձ է ներգրավվել
Վահագն Խաչատուրյանը հայտարարել է, որ ՀՀ-ն մտադիր է խաղաղության պայմանագիր կնքել Ադրբեջանի հետ մինչև COP29-ը
Քաղաքականություն
14.10.2024 | 19:42
Հայաստանի և Ադրբեջանի միջև խաղաղության պայմանագիրը կարող է ստորագրվել մինչև հաջորդ ամիս Բաքվում կայանալիք ՄԱԿ-ի կլիմայական COP29 համաժողովը։ Այս մասին FT-ին ասել է ՀՀ նախագահ Վահագն Խաչատուրյանը։
Նրա խոսքով՝ թեև կան չլուծված հարցեր, որոնք դեռևս պետք է համաձայնեցվեն, սակայն քննարկումների «ավարտին ենք մոտենում»։
«Լավ կլինի այն ստորագրել մինչև COP29-ը։ Բայց եկեք ժամանակից առաջ չվազենք»,- նշել է ՀՀ նախագահը։
Ըստ Խաչատուրյանի՝ ռազմագերիների հարցով քննարկումները խաղաղության համաձայնագրի բանակցությունների մաս չեն, բայց «դրանք մնում են օրակարգում»: Նա նաև հավելել է, որ հազիվ թե խաղաղության ցանկացած համաձայնագիր ի սկզբանե լիովին լուծի երկու երկրների բոլոր խնդիրները, բայց կարող է ընդլայնվել։
Ելույթ ունենալով Կայուն զարգացման Համբուրգի համաժողովի շրջանակում՝ Վահագն Խաչատուրյանն ասել էր, որ Հայաստանը պետք է հաշտություն կնքի իր հարևանների հետ։
«Երազների մեջ ապրելը լավագույն արդյունքը չէ: Մենք պետք է լինենք պրագմատիկ և իրատես: Մեզ պետք է խաղաղ ապրել, ոչ միայն Ադրբեջանի, այլև մեր բոլոր հարեւանների հետ»,- ասել էր նախագահը՝ նշելով, որ ԼՂ-ից Հայաստան եկած մոտ 100,000 փախստականներն «առանց որևէ բանի են եկել», և որ այդքան մեծ թվով տեղահանվածների ինտեգրման գործընթացն ընթացքի մեջ է:
Հայաստանը նաև ծրագրում է «բաց պահել իր դռները» Լիբանանից փախստականների համար, որտեղ ապրում են բազմաթիվ էթնիկ հայեր, եթե նրանք ստիպված լինեն հեռանալ, քանի որ Իսրայելն ուժեղացնում է իր արշավը, նշել է նա։
«Մենք պետք է պատրաստ լինենք նրանց ընդունելու համար»,- ասել է Խաչատուրյանը։
Հայաստանն ավելի ու ավելի է ակնարկում ԵՄ-ի հետ ավելի սերտ կապեր փնտրելու մասին և, ըստ Խաչատուրյանի, ունեն նմանատիպ արժեքներ, իսկ 2023 թվականին ԵՄ դիտորդական առաքելության տեղակայումն Ադրբեջանի հետ սահմանին օգնել է նվազեցնել լարվածությունը տարածաշրջանում:
Թարգմանությունը՝ Էմմա Չոբանյանի
