Բալասանյանի որդուց հետո ձերբակալվել են նաև փեսան ու Գյումրու քաղաքապետի տեղակալը․ փեսային որոշ ժամանակ անց ազատ են արձակել

Լուսանկարում՝ Ռուբեն Սանոյան, Սամվել Բալասանյան, Սուրեն Ջանոյան

Ձերբակալվել են Գյումրու քաղաքապետի տեղակալ Սուրեն Ջանոյանը և քաղաքապետի նախկին տեղակալ Ռուբեն Սանոյանը։ Այս տեղեկությունը Factor.am-ի հետ զրույցում հաստատում են Ներքին գործերի նախարարության և Քննչական կոմիտեի մեր աղբյուրները։

Factor.am-ը տեղեկացավ, որ Ռուբեն Սանոյանը ձերբակալությունից որոշ ժամանակ անց ազատ է արձակվել։

Ներկա և նախկին փոխքաղաքապետերը ձերբակալվել են Գյումրու նախկին քաղաքապետ Սամվել Բալասանյանի որդու՝ Խաչատուր Բալասանյանի գործով։

Ձերբակալվել է Սամվել Բալասանյանի որդին

Ավելի վաղ հայտնի էր դարձել, որ Խաչատուր Բալասանյանը «Զվարթնոց» օդանավակայանում՝ ԱՄՆ մեկնելիս, ձերբակալվել է ՔԿ-ում քննվող մի գործի շրջանակներում, որն առնչվում է «Սև բերդ» պատմական շինության սեփականաշնորհմանը։ Այն այժմ պատկանում է Բալասանյաններին։

Նշենք, որ ձերբակալված քաղաքապետի տեղակալը ևս Բալասանյանների թիմից է, նա նախկինում աշխատել է «Գյումրի-գարեջուր» ՍՊԸ-ում՝ որպես վարորդ-առաքիչ, իսկ հետո մատակարարման և առաքման բաժնի վարիչ:

Ռուբեն Սանոյանը Սամվել Բալասանյանի փեսան է՝ քրոջ ամուսինը։ Նրա դուստրը՝ Լուսինե Սանոյանը, այժմ Գյումրու քաղաքապետի առաջին տեղակալն է։

Հիշեցնենք, որ 2021 թվականին Գյումրիում տեղի ունեցած ՏԻՄ ընտրություններից հետո «Բալասանյան դաշինքը» և Նիկոլ Փաշինյանի ղեկավարած ՔՊ-ն կոալիցիա կազմեցին, բայց 2023 թվականի դեկտեմբերին «Քաղաքացիական պայմանագիրը» միակողմանիորեն խզեց «Բալասանյան դաշինք» սոցիալական կուսակցության հետ երկու տարի առաջ ստորագրած համագործակցության մասին հուշագիրը՝ նշելով, թե համայնքը կառավարվում է այլ ուժերի կողմից։

Այս բաժանումից հետո Բալասանյանի մյուս որդին՝ Միսակ Բալասանյանը, հետ կանչվեց Իրաքում ՀՀ դեսպանի պաշտոնից։ Նա դեսպան էր նշանակվել 2023 թվականի սեպտեմբերին։

Նարեկ Կիրակոսյան