Ադրբեջանում բանտարկված ընդդիմադիր լրագրողը մեկուսարանում խտրականության է ենթարկվել․ արգելվել են հանդիպումները մոր հետ

Ադրբեջանական ընդդիմադիր Abzas Media-ի գլխավոր խմբագիր Սևինջ Վագըֆքըզին խտրականության է ենթարկվել Բաքվի թիվ 1 քննչական մեկուսարանում, որտեղ նրան արգելել են հանդիպել մոր հետ։ Դա տեղի է ունեցել այն բանից հետո, երբ նա հրապարակել է օտարերկրյա քաղաքացիների՝ սեպտեմբերի 1-ի արտահերթ խորհրդարանական ընտրություններում մեկուսարանում քվեարկության փաստերը։ Այս մասին հայտնել է լրագրողի մայրը՝ Օֆելյա Մագերամովան, գրում են ադրբեջանական լրատվամիջոցները։

«Արտահերթ խորհրդարանական ընտրություններից հետո ինձ ու Սևինջին թույլ չեն տալիս հանդիպել։ Այն, ինչ մյուս բանտարկյալներին թույլ են տալիս անել, իմ դստերն արգելված է: Քննչական մեկուսարանի ղեկավար Էլնուր Իսմայիլովն ինձ ասաց, որ Սևինջին պատժել են վերջին խորհրդարանական ընտրություններում քվեարկությանն օտարերկրյա քաղաքացիների մասնակցությունը հրապարակայնացնելու համար։ Նա ասաց, որ չի փոխի իր որոշումը՝ անկախ նրանից, թե ում կբողոքենք»,- ասել է Մագերամովան։

Իր հերթին, փաստաբան Նեմաթ Քերիմլին լրագրողի՝ մորը տեսակցելու արգելքը գնահատել է որպես խտրականություն և օրենքի խախտում, ինչպես նաև հոգեբանական ճնշում Վագըֆքըզիի նկատմամբ։

Նման սահմանափակումներ են կիրառվում Abzas Media-ի տնօրեն Ուլվի Հասանլիի նկատմամբ։

Սևինջ Վագըֆքըզին Abzas Media-ի այն վեց լրագրողներից է, որոնք կալանավորվել են:

Նրանց մեղադրանք էր առաջադրվել Քրեական օրենսգրքի 206.3.2 հոդվածով (մաքսանենգություն  մի խումբ անձանց կողմից նախնական համաձայնությամբ), սակայն օգոստոսին լրագրողներին ավելի ծանր մեղադրանքներ են առաջադրվել՝ 192.3.2 հոդվածով (խոշոր եկամուտներով ապօրինի ձեռնարկատիրություն), 193-1.3.1 և 193-1.3.2-ով (փողերի լվացում կազմակերպված խմբի կողմից), 206.4 հոդվածով (մաքսանենգություն կազմակերպված խմբի կողմից), 320.1 և 320.2 (փաստաթղթեր կեղծելը և կեղծ փաստաթղթերի օգտագործումը), ինչպես նաև 213.2.1 հոդվածով (խմբակային հարկերից խուսափելը):

Թարգմանությունը՝ Էմմա Չոբանյանի