21.11.2024 | 21:45
Պուտինը մեկնաբանել է հեռահար զենքի օգտագործման հնարավորությունը
ԱՄՆ-ն կարծում է՝ Թուրքիան կարող է Ադրբեջանին զերծ պահել ՀՀ-ի դեմ ագրեսիայից․ Էրդողանի խոսքը այդ համատեքստում է․ Տիգրան Գրիգորյան․ՏԵՍԱՆՅՈՒԹ
Քաղաքականություն
27.09.2024 | 21:00
Նյու Յորքում ՄԱԿ գլխավոր ասամբլեայի 79-րդ նստաշրջանի ընթացքում ԱՄՆ պետքարտուղար Էնթոնի Բլինքենի նախաձեռնությամբ կայացած ՀՀ-ի և Ադրբեջանի ԱԳ նախարարների հանդիպումից հետո հաղորդագրություն է տարածվել, որում նշված է, թե «կողմերը համաձայնել են ներդնել լրացուցիչ ջանքեր «Խաղաղության և միջպետական հարաբերությունների հաստատման մասին» համաձայնագրի՝ ամենասեղմ ժամանակահատվածում կնքման ուղղությամբ»։ Բլինքենը ողջունել է երկարատև և արժանապատիվ խաղաղության հաստատման ուղղությամբ Հայաստանի և Ադրբեջանի ձեռք բերած առաջընթացը։ Բլինքենը կոչ է արել երկու երկրներին շարունակել ջանքերը՝ հնարավորինս շուտ համաձայնագիրը վերջնականացնելու ուղղությամբ: Պետքարտուղարն ընդգծել է, որ խաղաղության համաձայնագիրը կայունություն ու զարգացում կբերի տարածաշրջանին։ Ո՞րն է այս հանդիպման արդյունքը։
Ժողովրդավարության և անվտանգության տարածաշրջանային կենտրոնի ղեկավար, քաղաքագետ Տիգրան Գրիգորյանը հանդիպման հաղորդագրությունից դատելով՝ առանձնակի արդյունքներ չի տեսնում և ակնկալիք չի էլ ունեցել։
«Արդյունքը հանդիպման կայանալու փաստն է։ Ամերիկացիները մի քանի շաբաթ է՝ նախապատրաստում էին հանդիպումը։ Վերջին շրջանի ամերիկացի պաշտոնյաների այցերը կապված էին այդ հանդիպման կազմակերպման հետ։ Բայց ինչպես տեսնում ենք՝ որևէ առարկայական արդյունք չկա, և այդ բոլոր հայտարարությունները բազմիցս լսել ենք նաև նախկինում»,- ասաց նա։
Նիկոլ Փաշինյանի հետ հանդիպելուց հետո Էրդողանն ասել է, թե Թուրքիան աջակցում է Հայաստանի և Ադրբեջանի միջև խաղաղ համաձայնագրի ստորագրմանն ու բարիդրացիական հարաբերությունների հաստատմանն՝ այդ ուղղությամբ անհրաժեշտ ջանքեր գործադրելով․ «Երբ նայում ենք պարոն Փաշինյանի մոտեցումներին, նա բացասական չի տրամադրված»։ Էրդողանը նշել է, որ Երևանն ակնկալում է Անկարայի աջակցությունը՝ խաղաղության պայմանագրին հնարավորինս արագ հասնելու համար․ «Մենք ջանքեր ենք գործադրում այդ ուղղությամբ»,- ասել է Թուրքիայի նախագահը։ Էրդողանի այս հայտարարությունը արդյո՞ք կարելի է համարել Փաշինյանի հետ նրա խոսակցության բացահայտում․
«Դժվար է ասել, թե ինչ են խոսել՝ մանրամասներ չկան, թե ինչ են քննարկել։ ԱՄՆ-ն կարծում է, թե Թուրքիան ինչ-որ դերակատարություն պետք է ունենա այս պրոցեսում, և վերջին շրջանում այդ ուղղությամբ էին մտածում։ Ամերիկյան մոտեցումը վերջին մեկ տարում այն է, որ Ադրբեջանը հասել է իր նպատակներին, ՀՀ-ի նկատմամբ որևէ պահանջ պետք է դիտարկել որպես առավելապաշտության դրսևորում, և Թուրքիան պետք է դերակատարություն ունենա այս մեսիջը նաև Բաքվին հասցնելու։ Բայց պարզ է՝ քանի դեռ ՀՀ-ի և Ադրբեջանի միջև կան տարաձայնություններ, Անկարան աջակցելու է Բաքվին»։
Տիգրան Գրիգորյանը համարում է՝ հայ-ադրբեջանական պրոցեսում հնարավոր կլինի աջաընթացի մասին խոսել, եթե Ադրբեջանը դուրս գա ՀՀ-ից զավթած տարածքներից։
Հարցազրույցն ամբողջությամբ՝ տեսանյութում։
Ռոբերտ Անանյան
