24.04.2026 | 23:32
Կապանում ջրանջատում կլինի
Ինչու են Մինասյանի գլխին սև ամպեր կուտակվում․ ՔՊ-ում փակագծերը դեռ չեն բացում․ ՏԵՍԱՆՅՈՒԹ
Քաղաքականություն
26.09.2024 | 22:24
ԱԺ «Քաղաքացիական պայմանագիր» խմբակցության մի խումբ պատգամավորներ ստորագրահավաք են սկսել արդարադատության նախարար Գրիգոր Մինասյանին պաշտոնանկ անելու համար։ Պատգամավորները մի մասը թեև հաստատում է տեղեկությունը, սակայն նախընտրում է խոսել առանց անուններ և պատճառներ մատնանշելու։ Ոմանք էլ ասում են՝ խմբակցությունում չի քննարկվել, տեղյակ չեն։
Սիսակ Գաբրիելյանը ևս շեշտեց, որ տեղյակ չէ գործընթացից, սակայն ընդգծեց՝ Կառավարության աշխատանքը դրական է գնահատում, իսկ խմբակցությունում ազատ են այլ կարծիք ունենալ և դրա մասով գործընթաց սկսել։
Ազգային ժողովի փոխնախագահ Հակոբ Արշակյանը ևս դժգոհություններ չունի, նշում է՝ ստորագրահավաքի մասին մանրամասների չի տիրապետում։ Այնինչ Արմեն Խաչատրյանը, թեև չի մասնավորեցնում, սակայն հայտարարում է՝ կան նախարարություններ, որոնց աշխատանքից կուսակցությունում դժգոհ են։
Մինասյանի աշխատանքը բավարարո՞ւմ է Խաչատրյանին․ հարցին պատգամավորը բացասական պատասխան տվեց։
Ուշագրավ է, որ գրեթե 2 տարի արդարադատության նախարարի պաշտոնը զբաղեցնող Գրիգոր Մինասյանի աշխատանքի մասով դժգոհություններ չբարձրաձայնած խմբակցության քայլին նախորդել էր շաբաթներ առաջ արդարադատության փոխնախարարի պաշտոնում նշանակված Սիրվարդ Գևորգյանի աղմկահարույց լուսանկարի տարածումը սոցցանցերում։ Փոխնախարարի ձեռքին Ռոբերտ Քոչարյանի գիրքն է, իսկ կողքին՝ Հանրապետական կուսակցության անդամ Արփինե Հովհաննիսյանն ու Ռոբերտ Քոչարյանի դուստրը՝ Գայանե Քոչարյանը։
Արդյո՞ք արշավի համար նշանակություն ունեցել է Մինասյանի արյունակից հարազատների՝ հոր՝ Արա Մինասյանի և եղբոր՝ Միքայել Մինասյանի մի շարք աղմկահարույց քրեական գործերով անցնելը․ ՔՊ-ական պատգամավոր Հովիկ Աղազարյանը ոչ միանշանակ պատասխան է տալիս։
Արդյո՞ք իրենց նկատած խնդիրների մասին Մինասյանի նշանակման ժամանակ չէին կարող խոսել, իշխող ուժի ներկայացուցիչները խուսափողական պատասխաններ են տալիս։
Գյումրիի ժուռնալիստների «Ասպարեզ» ակումբի խորհրդի նախագահ Լևոն Բարսեղյանը նկատում է՝ այս մասին քաղհասարակությունը դեռևս 2 տարի առաջ էր բարձրաձայնում։
Մանրամասները՝ տեսանյութում։
Ռոզա Վարդանյան
P.S. Ռեպորտաժը պատրաստ էր, երբ հայտնի դարձավ, որ արդարադատության փոխնախարար Սիրվարդ Գևորգյանը հրաժարականի դիմում է ներկայացրել։ Նրա հրաժարականին ֆեյսբուքյան գրառմամբ անդրադարձել է Գրիգոր Մինասյանը․ «Վերջին օրերին բազմաթիվ անգամներ եմ խնդրել տիկին Գևորգյանին հրաժարական չտալ: Ցավոք, նա մերժեց իմ բոլոր խնդրանքները: Շատ ափսոս, որ առանձին անհատների չափազանց անարդար ու մանրախնդիր հարձակումների պատճառով մեր նախարարությունը և պետական համակարգը կորցրեց իրապես արժեքավոր մասնագետի ու կառավարչի: Պառլամենտարիզմի լավագույն դրսևորումը կլինի նման խարդավանքների համար քաղաքական հասցեական պատասխանատվությունը»:
