Ա. Սպենդիարյանի անվան օպերային թատրոնը և Լա Սկալա թատրոնի ակադեմիան  համագործակցության հուշագիր են ստորագրել 

Ա. Սպենդիարյանի անվան օպերայի եւ բալետի ազգային ակադեմիական թատրոնը եւ Լա Սկալա թատրոնի Կատարողական արվեստների եւ արհեստների ակադեմիան այսօր՝ սեպտեմբերի 23-ին, ստորագրել են համագործակցության հուշագիր, որը նպատակ ունի նպաստել երկու հաստատություններում կատարողական արվեստի զարգացմանը, ինչպես նաեւ սահմանել թատրոնների միջեւ համագործակցության ուղղությունները, այդ թվում՝ փորձի փոխանակման, կրթական եւ տեխնիկական վերապատրաստումների ոլորտներում․ տեղեկացնում են Ա. Սպենդիարյանի անվան օպերայի եւ բալետի ազգային ակադեմիական թատրոնից։

Հուշագիրը ստորագրել են Ա. Սպենդիարյանի անվան օպերայի եւ բալետի ազգային ակադեմիական թատրոնի տնօրեն Կարեն Դուրգարյանը եւ Լա Սկալա թատրոնի Կատարողական արվեստների եւ արհեստների ակադեմիայի գործադիր տնօրեն Լուիզա Վինչին։

Մաեստրո Կարեն Դուրգարյանի խոսքով սա բացառիկ եւ աննախադեպ մասշտաբի ծրագիր է, որը միտված է Օպերայի եւ բալետի ազգային ակադեմիական թատրոնի աշխատակիցների մասնագիտական կատարելագործմանը ֆոտո եւ վիդեոնկարահանման, բեմական ռեժիսուրայի, նոր մեդիայի, բեմական մենեջմենթի, բեմական լուսավորման եւ ձայնային ռեժիսուրայի, բեմական գրիմի եւ բեմական կոստյումների մշակման ոլորտներում։

Լուիզա Վինչին, կարեւորելով այս համագործակցությունը, նշել է, որ Ակադեմիան եւ իր գործընկերները կանեն առավելագույնս այս ծրագրի շրջանակում։ Ծրագիրը կնպաստի ոչ միայն թատրոնի ստեղծագործողների մասնագիտական հմտությունների կատարելագործմանը, այլեւ թույլ կտա զարգացնել բեմի տեխնիկական սպասարկումը եւ ժամանակակից կառավարումը։

ԿԳՄՍ նախարարի տեղակալ Դանիել Դանիելյանն իր հերթին մեծապես արժեվորել է այս փոխգործակցությունը, նշելով, որ Կառավարության եւ Նախարարության առաջնահերթություններից է հայ մշակույթի հանրահռչակումը, եւ սա գերազանց հնարավորություն է այդ նպատակն իրագործելու համար։ «Ուսանելով նման հեղինակավոր կառույցում՝ հայ մասնագետները կզարգացնեն իրենց մասնագիտական փորձառությունը՝ աշխատելով ժամանակին համընթաց եւ նպաստելով հայ մշակույթի եւ արվեստի զարգացմանը»,- նշել է փոխնախարարը։

Հանդիպմանը ներկա է գտնվել նաեւ Օպերայի եւ բալետի ազգային ակադեմիական թատրոնի միջազգային ներկայացուցիչ Էտտորե Վոլոնտիերին։ «Ես հայաստանյան օպերային թատրոնում առաջին անգամ եղել եմ 1992 թվականին, տեսել եմ, թե ինչ դժվարին ուղի է անցել թատրոնը, աշխատել եմ բազմաթիվ տաղանդավոր հայ արտիստների հետ, ովքեր մեծ բեմեր են նվաճել, ինչպես նաեւ արձանագրել եմ, թե ինչ մեծ զարգացում է ապրում թատրոնը հատկապես վերջին տարիներին։ Վստահաբար կարող եմ ասել, որ մաեստրո Դուրգարյանի այս նախաձեռնությունն առավելապես նոր նշաձող կսահմանի թատրոնի զարգացման գործում»,- հավելել է Վոլոնտիերին։

Նշենք, որ կրթական ծրագիրը մեկնարկելու է հաջորդ տարի՝ 2025 թվականի գարնանը։