Քաղաքականություն
21.11.2024 | 22:57
Կլիմայական ակտիվիստները և քաղաքացիական հասարակության խմբերը մտահոգություն են հայտնում Ադրբեջանի՝ որպես ՄԱԿ-ի կլիմայի շուրջ բանակցությունների հյուրընկալող երկրի դերի վերաբերյալ: Ավտորիտար երկիրը COP29-ից առաջ թիրախավորել է լրագրողներին, ակտիվիստներին և կառավարության քննադատներին և մեղադրվում է կլիմայի գագաթնաժողովը նավթի և գազի նոր գնորդներ ներգրավելու համար։
Democracy Now!-ը մասնակցել է մամուլի ասուլիսին, որը գլխավորել է Ադրբեջանի փոխարտգործնախարար Յալչին Ռաֆիևը․ նա COP29-ի գլխավոր բանակցողն է, սակայն նա հրաժարվել է պատասխանել ձերբակալությունների վերաբերյալ հարցին։
Լրագրող Էմի Գուդմենը մասնավորապես, հարցրել է․«Բազմաթիվ լրագրողներ և բնապահպան ակտիվիստներ կալանավորվել են այստեղ՝ Ադրբեջանում՝ COP-ին ընդառաջ, այդ թվում՝ հակակոռուպցիոն տնտեսագետ Գուբադ Իբադօղլուն, որը կոչ է անում ավելի մեծ թափանցիկություն ապահովել նավթի և գազի եկամուտների հարցում, և կլիմայի ակտիվիստներ, ինչպիսին է Անար Մամեդլին, COP-ից շաբաթներ առաջ հիմնադրել է կլիմայական արդարադատության խումբ: Հարցս հետևյալն է՝ արդյո՞ք նրանք COP-ից առաջ մյուս ձերբակալվածների հետ ազատ են արձակվելու։ Ինչո՞ւ են նրանք կալանավորվել։ Եվ քանի որ այստեղ COP-ում զբոսաշրջության օրն է, չե՞ք կարծում, որ սա մեծ վտանգ է զբոսաշրջության համար, երբ դուք ունեք նման բռնաճնշումներ որևէ երկրում»։
Ադրբեջանի ԱԳ փոխնախարարը խուսափել է հարցին պատասխանելուց։
«Չեմ պատրաստվում մեկնաբանել ընթացող դատական գործընթացները։ Մենք այստեղ ենք՝ հանուն մարդկության հավաքական ջանքեր գործադրելու՝ համաձայնեցնելու և ընդունելու կարևոր որոշումներ կլիմայական գործողությունների վերաբերյալ: Եվ ես վստահ եմ, որ սրանով, կողմերի վճռականությամբ մենք կհասնենք դրան։ Ես ավելի քան ուրախ կլինեի պատասխանել կլիմայական պայմաններին և ընթացող բանակցություններին վերաբերող ցանկացած հարցի»,-ասել է Ռաֆիևը։
Լրագրողն արձագանքել է, որ նրանք կլիմայական ակտիվիստներ են, կլիմայական տնտեսագետներ։
Մամուլի ասուլիսից հետո լրագրողը հանդիպել է COP-ի նախագահությունը ներկայացնող Ռաֆիևին, երբ նա խոսել է լրագրողների հետ սենյակից դուրս: Այնուհետև Ադրբեջանի ԱԳ փոխնախարարն արագորեն սկսել է քայլել, իսկ լրագրողը՝ հետևել նրան։ Ռաֆիևը կրկին չի պատասխանել հարցի՝ նշելով, թե շտապում է հանդիպման։
Հավելենք, որ ադրբեջանցի իրավապաշտպանների վերջին տվյալներով երկրում 319 քաղբանտարկյալ կա։
Էմմա Չոբանյան
