01.11.2024 | 20:30
Ան«վեթինգ» դատավորները․ ԲԴԽ-ն չունի բարեվարքության ստուգում չանցած դատավորների ցուցակը. ՏԵՍԱՆՅՈՒԹ
Ալիևի օգնականը կրկին ՀՀ Սահմանադրությունը փոխելու պահանջ է ներկայացրել
Քաղաքականություն
18.09.2024 | 15:17
Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևն ադրբեջանական լրատվամիջոցների հետ զրույցում դժգոհել է միջազգային հանրության կողմից Հայաստանին ցուցաբերվող օգնությունից։ Նա հայտարարել է, թե «Հայաստանի համար Մարշալի նոր պլան է պատրաստվում»։
«Այժմ Ադրբեջանի կառավարությունը միջոցներ է հատկացնում վերականգնողական և վերակառուցման աշխատանքների, ինչպես նաև տարածքների ականազերծման համար։ Հայաստանն է ավերվածությունների պատճառը, բայց միջոցները հատկացվում են Հայաստանին։ Սա պարադոքս է»,- ասել է Հաջիևը՝ նշելով, թե Ադրբեջանի և Հայաստանի նկատմամբ մոտեցումը նույնը չէ։
Խոսելով Հայաստանի հետ խաղաղության գործընթացից՝ Ալիևի օգնականն ասել է, թե ՀՀ-ն խաղաղության պայմանագրի տեքստի վերաբերյալ առաջարկներն ուղարկելու համար պահանջվեց ավելի քան 70 օր։
«Սա շատ երկար ժամանակ է։ Եթե Հայաստանը լրջորեն է վերաբերվում խաղաղության համաձայնագրի առաջխաղացմանը և շահագրգռված է այս հարցում, ապա 70 օրվա ընթացքում պատասխան ուղարկելն ինքնին հարցեր է առաջացնում։ Խաղաղության համաձայնագրի հետ կապված անելիքներ կան։ Դրանք, առաջին հերթին, ՀՀ Սահմանադրության հետ կապված հարցերն են։ Հայաստանի Սահմանադրությամբ պետք է վերջ տրվի Ադրբեջանի դեմ տարածքային պահանջներին։ Մեր ակնկալիքն այն է, որ խաղաղ համաձայնագրի հասնելու համար Հայաստանի Սահմանադրության մեջ կատարվելիք փոփոխություններն իրականացվեն հանրաքվեի միջոցով և հայ ժողովուրդն արտահայտի իր դիրքորոշումը»,- ասել է Հաջիևը։
Ըստ ադրբեջանցի պաշտոնյայի՝ «տարածաշրջանում կրկին քայլեր են արվում ռազմականացման քաղաքականության և լարվածության օջախների ստեղծման ուղղությամբ»։
«Տարածաշրջանից դուրս ուժեր կան, որոնք փորձում են աշխարհաքաղաքական ինտրիգների վրա հիմնված քաղաքականություն վարել։ Այս առումով Հայաստանը վարում է ռազմականացման քաղաքականություն։ Դա ներառում է ոչ միայն Ֆրանսիան, այլ նաև այլ երկրներ։ Տարածաշրջանում լիարժեք վստահության մթնոլորտ ստեղծելու համար պետք է որոշակի մեխանիզմ լինի Հայաստանի ռազմականացման քաղաքականությունը ստուգելու համար։ Հայաստանի ռազմականացման գործընթացի մասնակիցները պետք է հասկանան իրենց պատասխանատվությունը»,- հայտարարել է Ալիևի օգնականը։
Թարգմանությունը՝ Էմմա Չոբանյանի
