16.11.2024 | 11:07
Զիջի՛ր ճանապարհը․ րոպեն կարող է կյանք արժենալ․ ՆԳՆ իրազեկման արշավ է կազմակերպել
Ընտրվելու դեպքում Զարուհի Փոստանջյանը քաղաքապետարանի գործունեությունը թափանցիկ կդարձնի. ՏԵՍԱՆՅՈՒԹ
Քաղաքականություն
10.09.2018 | 15:07
«Երկիր Ծիրանին» սեպտեմբերի 23-ին նախանշված Երևանի ավագանու արտահերթ ընտրություններին հանդես է գալիս «Արդարություն և օրենք» կարգախոսով, կուսակցության նախընտրական ծրագիրն էլ բաղկացած է 19 կետից: Այս մասին այսօր քարոզարշավի առաջին օրը հրավիրված ասուլիսում հայտարարեց Երևանի ավագանու ընտրություններում քաղաքապետի թեկնածու, «Երկիր Ծիրանի» կուսակցության ղեկավար Զարուհի Փոստանջյանը:
Նրա խոսքով՝ «Երկիր Ծիրանիի» համար կարևորագույն արժեքներից են արդարության սկզբունքը, օրենքի և իրավունքի գերակայությունը, և այս արժեքներով են պատրաստվում ստանձնել Երևանի կառավարումն ու ծառայել մեր քաղաքացիներին: «Երևանի քաղաքապետարանի բյուջեի ծախսերը բաց, թափանցիկ և տեսանելի են լինելու հանրության համար: Երևանի բյուջեն շուրջ 170 մլն դոլար է, և այս մեկ տարվա ընթացքում, որ մենք եղել ենք քաղաքապետարանում, պարզել ենք, որ այս բյուջեն ոչ թե ծախսվում և ծառայում է իր նպատակին, այլ դրա մի մասը տարբեր եղանակներով ուղղակի յուրացվում է: Եվ այդ յուրացումների մի մասն էլ դուք տեսաք «Երևան» հիմնադրամի գործունեության հետ կապված հարուցված քրեական գործով»,- հայտարարեց Զարուհի Փոստանջյանը:
Քաղաքաշինություն, աղբահանություն, բնակելի ֆոնդ, սոցիալական առումով զարգացած քաղաք, կանաչ գոտիներ. կուսակցության նախընտրական ծրագրում ներառված կետերից են, որոնք Զարուհի Փոստանջյանն իր թիմի հետ պատրաստվում է իրականացնել:
Հիշեցնենք, որ 2017 թվականին տեղի ունեցած ընտրությունների արդյունքում «Երկիր Ծիրանին» Երևանի ավագանիում 5 մանդատ ստացավ: Որոշ ժամանակ անց, սակայն, խմբակցության 2 անդամներ հայտարարեցին «Երկիր Ծիրանին» լքելու մասին: Արտահերթ ընտրություններից կարճ ժամանակ առաջ էլ կուսակցությունից և ավագանու ընտրություններում ընտրացուցակից դուրս գալու մասին հայտնեցին «Երկիր Ծիրանիի» 4 անդամներ, այդ թվում՝ նախորդ ավագանիում «Երկիր Ծիրանի» խմբակցության անդամ Մարինա Խաչատրյանը:
