26.12.2025 | 23:15
Ալիևն Արցախում իր ընտանիքին պատկանող հերթական հյուրանոցն է բացել
Ֆրանսիայի ԱԳՆ-ն իր քաղաքացիներին խորհուրդ է տալիս Ադրբեջան չայցելել, եթե խիստ անհրաժեշտություն չկա․ Բաքուն արձագանքել է
Քաղաքականություն
04.09.2024 | 19:13
Ֆրանսիայի ԱԳ նախարարությունը երկրի քաղաքացիներին, այդ թվում՝ երկրքաղաքացիություն ունեցողներին խորհուրդ է տվել Ադրբեջան չմեկնել առանց լուրջ պատճառի։ Այս մասին ասվում է Ֆրանսիայի ԱԳՆ հայտարարության մեջ։
«Ֆրանսիայի քաղաքացիները, ներառյալ՝ երկքաղաքացիություն ունեցողները, ինչպես ռեզիդենտ, այնպես էլ տարանցիկ, Ադրբեջանում ենթարկվում են ձերբակալության, կամայական կալանքի և անարդար դատավարությունների ռիսկի։ Այս վտանգը կարող է ազդել հատկապես զբոսաշրջային կամ գործուղման մեջ գտնվող մարդկանց վրա: Ձերբակալության կամ կալանավորման դեպքում հիմնարար իրավունքների հանդեպ հարգանքը երաշխավորված չէ»,- նշվում է հայտարարությունում։
Բացի այդ, խորհուրդ չի տրվում մեկնել Հայաստանի հետ սահմանամերձ շրջաններ, ինչպես նաև Լեռնային Ղարաբաղի նախկին ինքնավար մարզի և նախկին հարակից շրջաններ։
Ադրբեջանի ԱԳՆ մամուլի խոսնակ Այխան Հաջիզադեն արդեն պատասխանել է Փարիզի հայտարարությանը՝ նշելով, որ Բաքուն խստորեն դատապարտում է այն։
«Ֆրանսիայի այս անհիմն և կողմնակալ որոշումն ու հայտարարությունը վկայում են Ադրբեջանի հետ հարաբերություններն է՛լ ավելի սրելու՝ Փարիզի մտադրության մասին։ Ֆրանսիայի Եվրոպայի և արտաքին գործերի նախարարության այն պնդումների համար, որ Ֆրանսիայի քաղաքացիները ձերբակալվում կամ կալանավորվում են առանց պատճառի, որևէ հիմք չկա։ Այս անհիմն հայտարարությունն իրականության խեղաթյուրում է»,- ասել է նա։
Նա նշել է, թե ներկայում Ադրբեջանում բանտարկված է Ֆրանսիայի երկու քաղաքացիներ․ նրանցից Մարտին Ռայանն անցյալ տարի դեկտեմբերի 4-ից կալանավորված է լրտեսության մեղադրանքով, իսկ Թեո Հյուգոն ձերբակալվել է Բաքվի մետրոյում գույքը վնասելու համար։
Հաջիզադեն նաև հավելել է, թե, իբր, Ֆրանսիայի կողմից ադրբեջանցի լրագրողների՝ Ֆրանսիա և նույնիսկ Շենգենյան գոտու այլ երկրներ մեկնելու խոչընդոտները լիովին հակասում են «մարդու իրավունքներին», միաժամանակ, Փարիզին մեղադրել «նեոգաղութային քաղաքականության, ռասիզմի, խտրականության, իսլամաֆոբիայի և մարդու իրավունքների սահմանափակումների մեջ»։
«Եվս մեկ անգամ պահանջում ենք դադարեցնել Ֆրանսիայի կողմից Ադրբեջանի դեմ զրպարտչական արշավը»,- նշվում է Բաքվի հայտարարության մեջ։
