ՌԴ-ն ձգտում է, որ ՀՀ-Ադրբեջան գործընթացը լինի իր պայմաններով․ Օ՛Բրայենը՝ խաղաղության պայմանագրի կարևորության մասին

Մենք աջակցում ենք Հայաստանի վարչապետ Նիկոլ Փաշինյանի խաղաղության ջանքերին, որը զարգացնում է Ադրբեջանի նախագահ Իլհամ Ալիևի հետ։ ԱՄՆ պետքարտուղարի Եվրոպայի և Եվրասիայի հարցերով  տեղակալ Ջեյմս Օ՛Բրայենն այս մասին հայտարարել է Սենատի արտաքին հարաբերությունների հանձնաժողովի տարածաշրջանային համագործակցության և անվտանգության ենթահանձնաժողովում «Եվրոպայի ապագայի» վերաբերյալ լսումների ժամանակ։

«Ռուսաստանը փորձում է համոզվել, որ այն, ինչ տեղի է ունենում այնտեղ, տեղի ունենա իր պայմաններով։ Կարծում եմ, որ, ճիշտն ասած, երկու երկրներն էլ որոշ չափով տարակուսած են նրա (Ռուսաստանի) ներկայությունից։ Մենք շատ ենք աշխատում, որ խաղաղության արտահայտված ցանկությունն արտացոլվի համաձայնագրում։ Մի փոքր ավելին կասեմ, թե ինչու է խաղաղության պայմանագիրն այդքան կարևոր։ Նայեք քարտեզին՝ Կենտրոնական Ասիայի բոլոր երկրներն աներևակայելի հարուստ են։ Այժմ նրանց միակ մուտքը համաշխարհային շուկա հիմնականում Ռուսաստանի կամ Չինաստանի միջոցով է։ Եթե ​​մենք կարողանանք երթուղի բացել Ադրբեջանով և Հայաստանով, ապա նրանք ելք կունենան դեպի համաշխարհային շուկաներ։ Սա կնվազեցնի նաև կախվածությունը Ռուսաստանից և Չինաստանից։ Այսպիսով, սա այն է, որ թույլ տանք երկրներին ընտրել իրենց ճանապարհները դեպի համաշխարհային շուկաներ»,- ասել է Պետքարտուղարության պաշտոնյան։

Նա նաև հայտարարել է, որ Հայաստանն ու Ադրբեջանը պայմանավորվել են սահմանի դեմարկացիայի շուրջ։

«Նրանք համաձայնել են՝ որոնք են սահմանները։ Կան որոշ տարածքներ, որ երկու կողմերն էլ շարունակում են օկուպացված պահել։ Սակայն համաձայնեցված սահմաններով նրանք, հավանաբար, նահանջեն, և այս առումով առանձնակի հետաքրքրություն են ներկայացնում բարձրլեռնային շրջանները: Բայց կրկին շեշտում եմ՝ սա գործընթաց է, որի վրա աշխատում են երկու կողմերը»,- նշել է Օ՛Բրայենը։