Բլինքենը հայտարարել է, որ Հայաստանի և Ադրբեջանի միջև խաղաղության համաձայնագրի կնքման բացառիկ հնարավորություն կա

Հայաստանի ու Ադրբեջանի դեպքում կա բացառիկ հնարավորություն, ներուժ՝ իրականություն դարձնելու խաղաղության համաձայնագիրը երկրների միջև, որը վերջ է դնում տասնամյակների հակամարտության և տարածաշրջանում հսկայական հնարավորություն ստեղծում՝ տնտեսական կապերի, տնտեսական աճի առումով։ Բրուքինգսի ինստիտուտում ունեցած ելույթում այս մասին հայտարարել է ԱՄՆ պետքարտուղար Էնթոնի Բլինքենը՝ հավելելով, որ Ադրբեջանը վճռորոշ դեր ունի այդ հարցում։

«Մենք ինտենսիվ դիվանագիտական ջանքեր ենք գործադրում՝ փորձելով օգնել Ադրբեջանին և Հայաստանին խաղաղության համաձայնագրին հասնելու գործում: Մենք դա արել ենք շատ սերտ համագործակցությամբ՝ Եվրամիության հետ համակարգելով, և ես կարծում եմ, որ դա իսկապես հասանելիության սահմանում է։ Կարծում եմ, որ դա հասանելի է, և դա ակնհայտորեն բխում է ինչպես Ադրբեջանի, այնպես էլ Հայաստանի, ինչպես նաև ավելի լայն տարածաշրջանի շահերից»,- ասել է Բլինքենը։

Խոսելով Վրաստանի, այդ թվում՝ «օտարերկրյա գործակալների» մասին օրենքի ընդունման մասին, Բլինքենը նշել է, որ ԱՄՆ-ն ու այլ երկրներ ոչ միայն խորը մտահոգություն են հայտնել դրա ընդունման վերաբերյալ, այլև քայլեր ձեռնարկել։

«Եվ ես կարծում եմ, որ դուք, հավանաբար, կտեսնեք դրանից ավելին: Կարծում եմ՝ դա ակնհայտորեն հակասում է եվրոպական ուղղությանը, որը ցանկանում է որդեգրել Վրաստանը, և որն ակնհայտորեն ցանկանում է որդեգրել վրաց ժողովրդի մեծամասնությունը»,- հայտարարել է ԱՄՆ պետքարտուղարը։