14.01.2026 | 17:08
Քաղաքականության մեջ Եկեղեցու ներգրավված լինելու մեղադրանքը անհիմն է ու անընդունելի․ Մայր Աթոռում ԳՀԽ նիստ է կայացել
Կոտրված դարպաս, առգրավված մեքենա. Շահրամանյանը հարցաքննվել է այլ վարույթի շրջանակում. ՏԵՍԱՆՅՈՒԹ
Քաղաքականություն
21.06.2024 | 21:15
Ոստիկանության հատուկջոկատայիններն այսօր կոտրել են Երևանում Արցախի Հանրապետության հատուկ ներկայացուցչության երկաթյա դարպասը, ներխուժել ներս և առգրավել Արցախի վերջին նախագահ Սամվել Շահրամանյանին սպասարկող մեքենան։ Շահրամանյանի փաստաբան Ռոման Երիցյանի խոսքով՝ դա տեղի է ունեցել օրենքի խախտմամբ՝ առանց դատարանի որոշման։
Քննչական կոմիտեից տեղեկացնում են, որ «Տոյոտա» մակնիշի ավտոմեքենան առգրավելու որոշումը կայացրել է քննիչը՝ քրեական վարույթի շրջանակում քննության համար էական նշանակություն ունեցող հանգամանքներ պարզելու նպատակով:
Երիցյանի խոսքով՝ այսօր ժամը 14:00-ին Շահրամանյանը հրավիրված է եղել հարցաքննության, և այդ գործողությունները տեղի են ունեցել հենց այդ ժամանակ։
Արցախի վերջին նախագաhը հարցաքննվել է մի քանի անգամ՝ վկայի կարգավիճակով։ Նրան սպասարկող «Տոյոտա» մակնիշի մեքենան շուրջ 15 օր չէր շահագործվում, կապարակնքված էր։
Factor TV-ի տեղեկություններով՝ Շահրամանյանի մեքենան առգրավվել է ամիսներ առաջ հասարակական հիմունքներով նրա օգնական Աշոտ Դանիելյանի մոտ թմրանյութ պահելու և իրացնելու մասով նախաձեռնված քրեական վարույթի շրջանակում, սակայն, մեր տեղեկություններով, Սամվել Շահրամանյանը հարցաքննվել է այլ վարույթի շրջանակում։ ՔԿ-ից այս առնչությամբ հրաժարվում են մեկնաբանություն տալ։
Հիշեցնենք՝ փետրվարի 20-ին դիմակավորված անձինք քաղաքացիական մեքենայով կանգնեցրել էին Աշոտ Դանիելյանին, ձեռնաշղթաներ հագցրել և իր իսկ մեքենայով տարել ոստիկանության բաժանմունք։ Ավելի ուշ հայտնի էր դարձել, որ նրա մոտ թմրամիջոց չի հայտնաբերվել։ Դանիելյանի նկատմամբ քրեական հետապնդում չի հարուցվել, սակայն նախաձեռնված վարույթը դեռ շարունակվում է, որի շրջանակում էլ այսօր առգրավվել և քննչական գործողությունների է տարվել Շահրամանյանին սպասարկող մեքենան։
Խորհրդարանական ընդդիմադիր «Հայաստան» խմբակցության պատգամավոր Արթուր Խաչատրյանի կարծիքով՝ այս ամենի հետևում քաղաքական հրահանգ կա։
Իրավապաշտպան Դանիել Իոաննիսյանի խոսքով էլ՝ Շահրամանյանին սպասարկող մեքենան պիտի առգրավվեր այն ժամանակ, երբ նա ստորագրեց Արցախի Հանրապետությունը լուծարելու հրամանագիրը։
Քննչական կոմիտեից, արձագանքելով ոչ իրավաչափ գործողությունների մասին մեղադրանքներին, նշում են, որ քաղաքական հրահանգ չկա, քննիչի գործողությունները եղել են իրավաչափ, դեռևս փետրվարին նախաձեռնված քրեական վարույթի շրջանակում քննության համար էական նշանակություն ունեցող հանգամանքներ պարզելու նպատակով մեքենան տեղափոխվել է հատուկ պահպանվող տարածք։ Թե ինչ հանգամանքների մասին է խոսքը, իրավապահ կառույցից փակագծեր չեն բացում։
Մանրամասները՝ տեսանյութում։
Արփի Հակոբյան
