Թուրքական կողմը մանրամասներ է հայտնել այսօր Անկարայում կայացած Թուրքիայի նախագահ Ռեջեփ Թայիփ Էրդողանի ու Ադրբեջանի նախագահ Իլհամ Ալիևի հանդիպման վերաբերյալ։
Թուրքիայի նախագահականը հաղորդում է, որ հանդիպմանը քննարկվել են Թուրքիա-Ադրբեջան հարաբերությունները, Գազայում Իսրայելի «վայրագությունները», ԼՂ-ի տարածքների «վերականգնման» ջանքերը, ինչպես նաև տարածաշրջանային և գլոբալ խնդիրներ։
«Նախագահ Էրդողանը հանդիպմանը հայտարարել է, որ Թուրքիան ուշադիր հետևում է Ռուսաստանի խաղաղապահ ուժերի դուրսբերմանը Ղարաբաղից և բարձր է գնահատել հայկական օկուպացիայից ազատագրված ադրբեջանական տարածքների վերակառուցման և վերականգնման ջանքերը»,-ասվում է հայտարարության մեջ։
Նշելով, որ «Իսրայելի ցեղասպան գործողությունները պաղեստինյան տարածքներում, հատկապես Գազայում, շարունակվում են, և որ Իսրայելի հանցագործությունները սպառնում են ոչ միայն տարածաշրջանային, այլև համաշխարհային անվտանգությանը, նախագահ Էրդողանը ասել է, որ մշտական լուծումը Արևելյան Երուսաղեմ մայրաքաղաքով պաղեստինյան պետության ստեղծումն է, և որ միջազգային հանրությունը պետք է ճնշում գործադրի Իսրայելի վրա՝ դրան հասնելու համար»:
Թուրքիայի նախագահը գոհունակություն է հայտնել Ադրբեջանի Միլլի Մեջլիսում Հյուսիսային Կիպրոսի (ՀԿԹՀ) հետ միջխորհրդարանական բարեկամության խումբ ստեղծելու որոշման առնչությամբ ու ասել է, որ ՀԿԹՀ նախագահ Էրսին Թաթարին հրավիրելով Թյուրքական պետությունների կազմակերպության հուլիսին Շուշի կայանալիք գագաթնաժողովին՝ Կիպրոսի գործը ամրացնում է։
Էրդողանը նաև իր երախտագիտությունն է հայտնել Ալիևին Ադրբեջանում ՄԱԿ-ի Կլիմայի փոփոխության կոնֆերանսին հրավիրելու համար։ Նա նշել է, որ Թուրքիան լիարժեք աջակցություն կցուցաբերի նախապատրաստական աշխատանքների ընթացքում, և որ նշանակալից իրադարձություններ տեղի կունենան «Զրո թափոններ» ծրագրի շրջանակներում, որը գլխավորում է Թուրքիայի Առաջին տիկին Էմինե Էրդողանը։
Հավելենք,որ հանդիպման մասին ավելի վաղ ադրբեջանական կողմն էր հաղորդագրություն տարածել։
Էմմա Չոբանյան
