Եկեղեցի-պետություն բաժանման, թագավոր օծելու և քաղաքացիական կրոնի մասին. ապաքաղաքական զրույց Ստեփան Դանիելյանի հետ․ ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Կոնցեպտուալ հարթակ» յութուբյան և տելեգրամյան ալիքի հիմնադիր Ստեփան Դանիելյանը: Նա վկայակոչում է Աստվածաշնչի հետազոտողներին, ըստ որոնց՝ «Կեսարինը՝ կեսարին, Աստծունը՝ Աստծուն» բանաձևն ավելացել է երրորդ դարում, երբ Հռոմում քրիստոնեություն էր ընդունվում և պետք էր հարաբերություններ հաստատել եկեղեցու հետ:

Եկեղեցու և պետության օրենսդրական բաժանումն առաջին անգամ տեղի է ունեցել Ֆրանսիայում 1905 թվականին, իսկ դա պայմանավորված էր նրանով, որ խնդիր էր դրված կաթոլիկ եկեցեցին դուրս բերել կրթական համակարգից:

Որպես կրոնապետություն՝ հաղորդման հյուրը բերում է Իրանի, Իսրայելի, Մեծ Բրիտանիայի օրինակները: Վերջին դեպքում կրոնապետությունը կրում է ձևական բնույթ, սակայն դարձյալ կազմում է պետական ավանդույթների հիմքը: Իրանի և Իսրայելի հակադրության մեջ նա տեսնում է նաև միստիկական հիմք՝ երկու կրոնների հավակնությունները միևնույն Տաճարի հանդեպ:

Ֆրանսիական Մեծ հեղափոխությունը, Նապոլեոնը, ԱՄՆ հիմնադիր հայրերն առաջ էին քաշում «քաղաքացիական կրոնի» իրենց տարբերակները: Ընդ որում, Միացյալ Նահանգներում պետականությունը հիմնված է Աստծո, բայց ոչ Քրիստոսի գաղափարի վրա, որը կատարում է «կարգավորող դեր»: Ամեն մի ազգի և դավանանքի հնարավորություն է տրված այդ կարգավորումը կիրառել՝ իրենց մշակութային ավանդույթներից ելնելով:

Մանրամասները՝ տեսանյութում:

Արամ Աբրահամյան