17.12.2025 | 15:14
Անկարան ու Բաքուն ռազմական համագործակցության հարցեր են քննարկել
ՌԴ-ն ողջունում է Ալմաթիում անցկացված Հայաստանի և Ադրբեջանի ԱԳ նախարարների բանակցությունները
Քաղաքականություն
15.05.2024 | 12:22
Մոսկվան ողջունում է մայիսի 10-ին և 11-ին Ալմաթիում խաղաղության պայմանագրի շուրջ Ադրբեջանի և Հայաստանի արտգործնախարարների միջև բանակցությունների անցկացումը, News.ru-ին տված հարցազրույցում ասել է ՌԴ ԱԳ փոխնախարար Միխայիլ Գալուզինը։
«Արվել է ևս մեկ քայլ Հարավային Կովկասում հուսալի ու երկարաժամկետ խաղաղության և կայունության հասնելու ուղղությամբ։ Մենք լիովին աջակցում ենք Աստանայի ջանքերին այս ուղղությամբ։ Եթե նայենք պատմությանը, ապա Ղազախստանը զգալի ներդրում է ունեցել 1991 թվականի սեպտեմբերին Ժելեզնովոդսկի հռչակագրի մշակման և ընդունման գործում՝ Լեռնային Ղարաբաղի հակամարտության գոտում ռազմական առճակատումը դադարեցնելու առաջին լուրջ փորձերից մեկը»,- ասել է ՌԴ ԱԳ փոխնախարարը։
Անդրադառնալով տարածաշրջանում հաղորդակցությունների ապաշրջափակմանը՝ Գալուզինը շեշտել է, թե Մոսկվան չի օգտագործում, այսպես կոչված, «Զանգեզուրի միջանցք» եզրույթը:
«Ռուսաստանը հանդես է գալիս ոչ թե որևէ կոնկրետ երթուղու ստեղծման, այլ Հարավային Կովկասում տնտեսական և տրանսպորտային հաղորդակցությունների ամբողջական ապաշրջափակման օգտին։ Հենց դա է անում 2021 թվականին Ռուսաստանի, Ադրբեջանի և Հայաստանի ղեկավարների որոշմամբ ստեղծված եռակողմ աշխատանքային խումբը՝ երեք երկրների փոխվարչապետերի համանախագահությամբ»,- ասել է նա։
Ըստ պաշտոնյայի՝ 2023 թվականի հունիսին խմբի 12-րդ նիստում ընդհանուր փոխըմբռնում է ձեռք բերվել Հայաստանի և Ադրբեջանի միջև երկաթուղային հաղորդակցության վերականգնման և կազմակերպման շուրջ։
«Մենք գրեթե հասել ենք համապարփակ, հավասարակշռված համաձայնության։ Սակայն գործընթացը կանգ է առել ոչ մեր մեղքով։ Արևմտյան երկրների ճնշման ներքո Երևանը որոշեց սառեցնել եռակողմ համագործակցությունը նաև այս ուղղությամբ: Անհրաժեշտ ենք համարում շուտափույթ վերսկսել ամբողջական աշխատանքը ոչ միայն Հարավային Կովկասի տրանսպորտահաղորդակցային համակարգն ապաշրջափակելու, այլև տարածաշրջանում կայուն խաղաղություն հաստատելու համար»,- հայտարարել է ՌԴ ԱԳ փոխնախարարը։
